کرزئی کو امریکی فوج پر تنقید کے بجائے احسان مند ہونا چاہیے لیون پنیٹا

امریکی وزیر دفاع لیون پنیٹا نے افغان صدر حامد کرزئی کے بیان پر ردعمل ظاہر کرتے ہوئے کہا ہے کہ حامد کرزئی کو امریکی فوج پر تنقید کی بجائے اس کی قربانیوں کا احسان مند ہونا چاہیے۔


اپنے طیارے میں صحافیوں سے گفتگو کرتے ہوئے پنیٹا نے کہا کہ حامد کرزئی کو یاد رکھنا چاہیے کہ امریکا نے افغانستان میں اپنے 2 ہزار فوجیوں کی قربانی دی ہے۔ امریکا افغانستان میں حقیقی دشمن سے نبرد آزما ہے۔ شدت پسندوں کے خلاف جنگ میں امریکا، ایساف اور افغانستان نے بھی جانی نقصان اٹھایا ہے۔

پنیٹا نے مزید کہا کہ اگر افغان صدر ان قربانیوں پر تنقید کی بجائے اس پر شکریہ ادا کریں تو یہ بہتر ہوگا۔ امریکی وزیر دفاع کا کہنا تھا کہ افغانستان میں یونیفارم میں موجود لوگ افغانستان کی خود مختاری کیلئے لڑ رہے ہیں۔ واضح رہے کہ صدرکرزئی نے گزشتہ روز بیان دیا تھا کہ امریکا شدت پسندوں کے پاکستان میں ٹھکانوں کے خلاف کارروائی کی بجائے صرف افغانستان کے دیہات میں جنگ کر رہا ہے۔