افغان فورسز کی کارروائی میں تحریک طالبان کے قاری شکیل اور ڈاکٹرطارق ہلاک

افغان فورسز نے کارروائی کرتے ہوئے کالعدم تحریک طالبان پاکستان کی مرکزی شوریٰ کے سابق امیر قاری شکیل اور ڈاکٹر طارق المعروف ابو عبیدہ الاسلام کو ہلاک کر دیا۔


غیر ملکی خبر رساں ادارے کے مطابق افغان فورسز نے پاکستان سے ملحقہ سرحدی علاقے کوہستان پرچاؤ میں خفیہ آپریشن کر کے کالعدم تحریک طالبان پاکستان کی مرکزی شوریٰ کے سابق امیر قاری شکیل اور ڈاکٹر طارق المعروف ابو عبیدہ کو ہلاک کردیا۔ کالعدم تنظیم کے ترجمان محمد حراسانی نے دونوں افراد کے مارے جانے کی تصدیق کردی ہے۔

برطانوی نشریاتی ادارے کے مطابق جماعت الحرار کے ترجمان احسان اللہ احسان نے بھی قاری شکیل اور ان کے ایک ساتھی ڈاکٹر طارق علی کی افغانستان کے صوبے ننگرہار میں ایک کارروائی کے دوران ہلاکت کی تصدیق کردی ہے۔ احسان اللہ احسان نے دونوں شدت پسندوں کی ہلاکت کا الزام پاکستان پر لگایا ہے۔