روس کے شاپنگ پلازہ میں آگ لگنے سے 11 افراد ہلاک

آتشزدگی کے واقعے کی تحقیقات بھی شروع کردی گئی ہے، حکام

---

روس کے شاپنگ پلازہ میں آگ لگنے سے 11 افراد جھلس کر ہلاک ہوگئے جب کہ 25 تاحال لاپتا ہیں۔

غیر ملکی خبر رساں ادارے کے مطابق روس کے دارالحکومت ماسکو کے قریب شاپنگ پلازہ میں اچانک آگ بھڑک اٹھی جس نے دیکھتے ہی دیکھتے 3 منزلہ شاپنگ پلازہ کو اپنی لپیٹ میں لے لیا جس کے نتیجے میں 11 افراد جھلس کر ہلاک اور16 زخمی ہوگئے جب کہ 25 افراد لاپتا ہیں۔

حکام کے مطابق آگ لگنے سے شاپنگ پلازہ میں واقع دکانوں میں موجود قیمتی سامان جل کر خاکستر ہوگیا جب کہ عمارت سے 650 افراد کو بحفاظت نکال لیا گیا۔ حکام کا کہنا ہے کہ واقعے کے بعد امدادی کارروائیاں شروع کردی گئی ہیں اور زخمی افراد کو طبی امداد کے لیے اسپتال منتقل کردیا گیا ہے جن میں بعض کی حالت تشویشناک ہونے کے باعث ہلاکتوں میں اضافے کا بھی خدشہ ہے جب کہ آتشزدگی کے واقعے کی تحقیقات بھی شروع کردی گئی ہے۔