پاکستان کوارٹر فائنل جیت گیا تو کوئی ٹیم ورلڈ کپ جیتنے سے نہیں روک سکے گی عمران خان

قومی کرکٹ ٹیم کے سابق کپتان عمران خان نے کہا ہے کہ اگر پاکستانی ٹیم کوارٹر فائنل میں کامیاب ہوئی تو دنیا کی کوئی ٹیم اسے ورلڈ کپ ٹائٹل جیتنے سے نہیں روک سکے گی۔


اپنے انٹرویو میں سابق کپتان نے کہا کہ آسٹریلیا میں واحد ایڈیلیڈ اسٹیڈیم ہے جہاں کی وکٹ اسپنرز کیلیے موزوں ہوتی ہے اس لیے میں سمجھتا ہوں کہ مصباح الحق کو ایک فاسٹ باؤلر کو ڈراپ کر کے یاسر شاہ کو کھیلانا چاہیے۔ میں سمجھتا ہوں کہ اس گراؤنڈ پر گرین شرٹس کینگروز کو ہرا سکتے ہیں تاہم انھیں سپنرز کو کھیلانا ہو گا۔ محمد عرفان ورلڈ کپ میں خطرناک ترین بالر ہیں، مصباح کو چاہیے کہ انھیں رنز بچانے کیلیے نہیں بلکہ وکٹیں لینے کیلیے استعمال کریں، سرفراز احمد اگلے میچوں میں بھی ٹیم کو فتوحات دلانے میں کردار ادا کریں گے۔