اڈیالہ جیل میں قید 13 مجرموں کے ڈیتھ وارنٹ جاری

ڈیتھ وارنٹ جاری ہونے کے بعد 2 مجرموں کو 17، چار کو 18 اور دیگر 4 کو 19 مارچ کو تختہ دار پر لٹکایا جائے گا۔ فوٹو: فائل

---

لاہور: اڈیالہ جیل میں قید 13 مجرموں کے ڈیتھ وارنٹ جاری کردیئے گئے۔

ایکسپریس نیوز کے مطابق اڈیالہ جیل میں قید مختلف مقدمات میں سزائے موت پانے والے 13 مجرموں کے ڈیتھ وارنٹ جاری کردیئے گئے، ڈیتھ وارنٹ جاری ہونے کے بعد 2 مجرموں کو 17، چار کو 18 اور دیگر 4 کو 19 مارچ کو تختہ دار پر لٹکایا جائے گا جب کہ 3 مجرموں کی پھانسی کی تاریخ مقررنہیں کی گئی۔ اڈیالہ جیل میں سزائے موت کے 412 قیدی موجود ہیں جس میں سے 180 کی اپیلیں عدالت میں ہیں جب کہ 80 کی اپیلیں سپریم کورٹ میں اور 39 مجرموں نے صدر مملکت سے رحم کی اپیلیں کررکھی ہیں۔

واضح رہے کہ سانحہ پشاور کے بعد ملک بھر میں پھانسی کی سزاؤں پرعملدر آمد کرتے ہوئے 20 سے زائد مجرموں کو تختہ دارپرلٹکایا جا چکا ہے۔