بھارتی ڈائریکٹرفلم ’’ شورشرابا ‘‘ کیلیے لاہور آئیں گے

پاکستان میں شمالی علاقہ جات میں لوکیشنزکو حتمی شکل دینگے، کوریوگرافرمئی میں آئیں گے

Qaiser Iftikhar March 15, 2015

ہم بین الاقوامی فلم بنا رہے ہیں، حسین کی فلم کی ٹیم کیساتھ ورکشاپ بھی ہے: سہیل خان فوٹو : فائل

بالی ووڈ کے معروف ڈائریکٹر حسین حیدرآباد والہ بطورڈائریکٹراپنی پہلی پاکستانی فلم '' شورشرابا '' کی لوکیشنز اور ٹیم کے ساتھ ورکشاپ کرنے کے لیے رواں ماہ کے آخر میں لاہور پہنچیں گے۔

فلم کے پروڈیوسرسہیل خان نے اس سلسلہ میں بھارتی ڈائریکٹر کو گرین سگنل دیدیاہے۔ پاکستان میں مختصرقیام کے دوران جہاں حسین حیدرآباد والہ فلم کی لوکیشنزکوفائنل کریں گے،وہیں کاسٹ میں شامل تمام فنکاروں اورتکنیکاروں کے ساتھ دوروزہ ورکشاپ بھی کرینگے۔ واضح رہے کہ حسین حیدرآباد والہ بالی وڈ میں ''کلر، جشن ، دی ٹرین اور یا رب'' جیسی فلموں کی ڈائریکشن دے چکے ہیں۔ جب کہ سہیل خان اورمہیش بھٹ کی مشترکہ فلموں کی ڈائریکشن بھی ان ھی نے دی ہے۔

اس حوالے سے سہیل خان نے ''ایکسپریس'' کوبتایاکہ فلم کی شوٹنگ کے لیے ہماری طرف سے تمام ترتیاریاں مکمل ہوچکی ہیں اور رواں ماہ کے آخر میں حسین حیدرآباد والا لاہورآئیں گے جب کہ ان کی ٹیم میں بالی ووڈ سے شامل کوریوگرافر اور ڈی او پی جولائی میں پاکستان پہنچیں گے۔

اس مرتبہ حسین حیدرآباد والہ اکیلے لاہور آرہے ہیں اور وہ یہاں مختصرقیام کے دوران شمالی علاقہ جات میں لوکیشنزکوحتمی شکل دینگے۔ انھوں نے بتایا کہ ہم ایک بین الاقوامی معیارکی فلم بنانے جا رہے ہیں، جودنیا بھر میں نمائش ہونے کے ساتھ پاکستان کی نمائندہ کے طورپرسامنے آئے گی۔