ورلڈ کپ ٹرافی جیتنے کا خواب آنکھوں میں سج گیا

آسٹریلیا کا بولنگ اٹیک کافی اچھا ہے ہمیں اس مقابلے میں اپنی پوری قوت صرف کرنا ہوگی، مصباح الحق

Sports Desk/AFP March 16, 2015

توقعات اور دیگر عوامل کا دباؤ آسٹریلیا پر ہوگا اس لیے گھبرانا اسی کو ہی چاہیے، مصباح الحق۔ فوٹو: فائل

لاہور: کوارٹر فائنل میں رسائی پانے کے بعد پاکستان نے ورلڈ کپ ٹرافی جیتنے کا خواب آنکھوں میں سجالیا، تاہم اس کیلیے گرین شرٹس کو کینگروز کے شکار کا چیلنج درپیش ہے۔

کپتان مصباح الحق کا کہنا ہے کہ گھبرانا تو آسٹریلیا کو چاہیے، میزبان سائیڈ فیورٹ جبکہ ہمارے پاس کھونے کو کچھ بھی نہیں ہے، نہ صرف آسٹریلوی ٹیم کو شکست دے سکتے بلکہ ورلڈ کپ بھی جیت سکتے ہیں، اگلے میچ میں یونس خان کو کھلانے کا فیصلہ ٹیم کے مفاد کو سامنے رکھتے ہوئے کیا جائے گا، ون ڈے کرکٹ میں کسی ٹیم کو آسان نہیں سمجھا جاسکتا، بولنگ اٹیک ردھم میں آچکا، ہمارے بولرز کسی بھی ٹیم کو سرپرائز دے سکتے ہیں، سرفراز احمد کو کھلانے کے سوا ہمارے پاس کوئی چارہ نہیں تھا، وکٹ کیپر بیٹسمین نے شاندار کم بیک کیا ہے۔

تفصیلات کے مطابق پاکستان نے آخری پول میچ میں آئرلینڈ کو شکست دے کر کوارٹر فائنل میں جگہ بنالی ہے جہاں پر اس کا مقابلہ جمعے کو میگا ایونٹ کی شریک میزبان آسٹریلیا سے ہوگا، یہ مقابلہ اسی وینیو پر ہی ہوگا جس پر گرین شرٹس نے آئرش ٹیم کو پچھاڑا اور اب وہ کینگروز کے شکار کے چیلنج سے نمٹنے کو بھی تیارہیں۔ کپتان مصباح الحق کہتے ہیں کہ اس بات میں کوئی شک و شبہ نہیں کہ ہم آسٹریلیا کو شکست سے دوچار کرسکتے ہیں، ون ڈے کرکٹ میں کچھ بھی ہوسکتا ہے، کوئی بھی اپنی کامیابی کو یقینی نہیں سمجھ سکتا، بلاشبہ آسٹریلیا اپنے ملک میں کھیل رہا اور اپنی کنڈیشنز سے اچھی طرح آگاہ ہے، انھیں ہوم کراؤڈ کی حمایت بھی حاصل ہے لیکن آپ کبھی بھی پیشگوئی نہیں کرسکتے کہ نتیجہ کیا برآمد ہوگا۔

ایک روزہ کرکٹ میں کوئی بھی ٹیم کسی بھی سائیڈ کو زیر کرسکتی ہے، اگر آسٹریلیا ایڈیلیڈ کو اچھی طرح جانتا ہے تو پھر ہمیں بھی اس وینیو کا اچھے سے اندازہ ہوچکا ہے۔ مصباح الحق نے واضح کیا کہ توقعات اور دیگر عوامل کا دباؤ آسٹریلیا پر ہوگا اس لیے گھبرانا اسی کو ہی چاہیے۔ انھوں نے کہا کہ وہ ایونٹ کی فیورٹس ٹیموں میں سے ایک ہیں مگر دباؤ بھی ان پر ہی ہوگا، ہمارے پاس کھونے کو کچھ بھی نہیں ہے، ہمیں ویسے ہی بیٹنگ کرنے کی ضرورت ہے جیسی ہم نے آئرلینڈ سے میچ میں کی، آسٹریلیا کا بولنگ اٹیک کافی اچھا ہے ہمیں اس مقابلے میں اپنی پوری قوت صرف کرنا ہوگی۔

مصباح الحق ایسی کوئی بھی وجہ نہیں دیکھتے کہ پاکستان 29 مارچ کو ورلڈ کپ کا چیمپئن نہیں بن سکتا، وہ کہتے ہیں کہ ہم اس مرتبہ ورلڈ کپ جیت سکتے ہیں، کامیابی کی راہ پر گامزن ہوچکے، ہمارے حوصلے اور اعتماد بلند ہے، بولنگ اچھی جارہی ہے، بیٹنگ نے بھی کلک کرنا شروع کردیا ہے، بولرز ردھم میں آچکے ہیں اور وہ کسی بھی ٹیم کو حیران کرسکتے ہیں، بعض اوقات پہلے بولنگ کرتے ہوئے آپ ریورس سوئنگ کرتے ہیں لیکن شام میں اوس کی وجہ سے یہ مشکل ہوجاتا ہے لیکن آسٹریلوی کنڈیشنز میں پیس اور باؤنس موجود ہے اگر آپ کے بولرز 150 میل فی گھنٹہ کی رفتار کے آس پاس بولنگ کرسکتے ہیں تو پھر اس سے کوئی فرق نہیں پڑتا کہ گیند ریورس سوئنگ ہوتی ہے یا نہیں، اس سے بیٹسمینوں کو پریشان کیا جاسکتا ہے، اگر درست ایریاز میں بولنگ کی جائے تو آپ شارٹ بال سے بھی وکٹیں لے سکتے اور حریف بیٹسمینوں کو دباؤ میں لاسکتے ہیں ایسے میں اگر ریورس سوئنگ بھی ہوجائے تو یہ کسی بونس سے کم نہیں ہے۔

مین آف دی میچ سرفراز احمد کے بارے میں مصباح الحق کا کہنا تھا کہ جب ہم نیوزی لینڈ آئے تو وہاں پر وارم اپ گیمز اور پھر ون ڈے میں کھلایا، اسی طرح ورلڈ کپ سے قبل بھی وارم اپ میچ میں ان کو موقع دیا مگر وہ بہتر بیٹنگ نہیں کرپائے، نیٹ میں بھی انھیں بیٹنگ میں دشواری کا سامنا تھا جس کی وجہ سے ہم نے اپنا ذہن تبدیل کیا، ہمارے پاس ایک اسپیشلسٹ اوپنر موجود تھا اس کو فارم میں آنے کا موقع دیالیکن جب وہ ناکام ہوئے تو ہمارے پاس سرفراز کو واپس لانے کے سوا اور کوئی چارہ بھی نہیں تھا، انھیں ٹاپ آرڈر پر کھلایا گیا جس کا انھوں نے اچھا جواب دیا، پہلے میچ میں 49 رنز اسکور کیے اور اب سنچری اسکور کی، اس مقابلے میں بھی بڑی پارٹنر شپ ضروری تھی اور سرفراز نے ذمہ داری ادا کی۔ یونس خان کو پھر باہر بٹھانے کے بارے میں مصباح نے کہا کہ یونس خان تجربہ کار بیٹسمین اور اچھی کارکردگی کا مظاہرہ کرسکتے ہیں، ان کو آسٹریلیا کے خلاف کھلانے کا فیصلہ ٹیم کے مفاد کو مدنظر رکھتے ہوئے کیا جائے گا۔