بھارت کاپاکستان کے ساتھ کشمیر سمیت تمام تنازعات پرمذاکرات کافیصلہ

مودی اسلام آباد میں منعقد ہونی والی سارک کانفرنس میں پاکستانی ہم منصب کےساتھ تمام تنازعات کےحل کیلیےبات چیت کریں گے۔ فوٹو: فائل

---

بھارت کے وزیراعظم نریندر مودی اگلے سال کے آغاز پر اسلام آباد میں منعقد ہونی والی سارک سربراہ کانفرنس میں شرکت کے موقع پر پاکستانی ہم منصب کے ساتھ کشمیر سمیت تمام دیرینہ تنازعات کے حل کیلیے مذاکراتی عمل شروع کرنے پربھی بات چیت کریں گے۔

حال ہی میں پاکستان کا دورہ کرنے والے بھارتی خارجہ سیکریٹری نے وزیراعظم مودی کا وزیراعظم نوازشریف کوخط پہنچایا جس میں نہ صرف سارک کانفرنس میں شرکت کی تصدیق کی گئی بلکہ یہ بھی بتایا گیا کہ بھارتی وزیراعظم پاکستانی ہم منصب کے ساتھ مذاکرات بھی کریں گے۔

یہ بات وزیراعظم ہاؤس کے ذرائع نے وزیراعظم مودی کے خط کے مندرجات کا حوالہ دیتے ہوئے نام ظاہر نہ کرنے کی شرط پر بتائی ہے۔ان ذرائع نے بتایا کہ وزیراعظم مودی کا خط بھارتی موقف میں تبدیلی کا عکاس ہے، بھارت نے گزشتہ برس پاکستانی حکام کی مقبوضہ کشمیرکی حریت قیادت کے ساتھ ملاقات پر ناراض ہونے کا بہانہ بنا کر سیکریٹری خارجہ سطح کے مذاکرات ملتوی کردیے تھے۔