لیگل نوٹس پانے والے سرفراز نواز سعید اجمل کے ساتھ ٹی وی شو میں شریک
اس وقت بورڈ میں آوےکا آوا ہی بگڑا ہوا ہےاورکوئی پوچھ گچھ نہ ہونے کےسبب جس کےدل میں جو آئے وہ وہی کر رہا ہے، ذرائع
حکام کی ڈھیل نے سینٹرل کنٹریکٹ یافتہ کرکٹرز کو بھی بے قابو کردیا، بورڈ نے سابق پیسر سرفراز نواز پر ہتک عزت کا دعویٰ کیا ہوا ہے۔
دوسری جانب آف اسپنر سعید اجمل انہی کے ساتھ ٹی وی پر شو کر رہے ہیں، اسی طرح سلیکٹرز بھی پورے ورلڈکپ کے دوران ٹیم کی فکر کرنے کے بجائے مختلف چینلز پر تبصرے کرکے نوٹ کماتے رہے،گذشتہ دنوں ایک ٹی وی شو میں کسی اداکارہ نے جونیئر چیف سلیکٹر باسط علی کے ساتھ ہتک آمیز سلوک کیا، سابق ٹیسٹ کرکٹر نے جب کوارٹر فائنل میں پاکستان کیخلاف آسٹریلیا کو فیورٹ قرار دیا تو مذکورہ اداکارہ نے کہا کہ ''آپ تو ہمیشہ منحوس باتیں ہی کرتے ہیں'' اس پر سب دیر تک قہقہے لگاتے رہے مگر وقت نے باسط کی پیشگوئی درست ثابت کر دی۔ ذرائع نے بتایا کہ اس وقت بورڈ میں آوے کا آوا ہی بگڑا ہوا ہے، کوئی پوچھ گچھ نہ ہونے کے سبب جس کے دل میں جو آئے وہ وہی کر رہا ہے۔