نواز شریف کی قیادت میں ملک نے 3 سال کا سفر ڈیڑھ سال میں طے کیا اسحاق ڈار

حکومت کے ٹھوس اقدامات کی وجہ سے مختصر وقت میں اہداف حاصل کر رہے ہیں، اسحاق ڈار فوٹو: ایکسپریس نیوز

---

GILGIT: وفاقی وزیر خزانہ اسحاق ڈار نے کہا ہے کہ کراچی سمیت ملک بھر میں کسی سیاسی جماعت کے خلاف آپریشن نہیں ہورہا اور وزیر اعظم نواز شریف کی قیادت میں ملک نے 3 سال کا سفر ڈیڑھ سال میں طے کیا۔

کراچی میں تقریب سے خطاب کے دوران وزیر خزانہ اسحاق ڈار نے کہا کہ کراچی سمیت ملک بھر میں کسی سیاسی جماعت کے خلاف آپریشن نہیں ہورہا، جرائم پیشہ عناصر کے خلاف آپریشن تمام جماعتوں کو اعتماد میں لے کر شروع کیا گیا جس میں خاطر خواہ کامیابی حاصل ہوئی جب کہ آپریشن ''ضرب عضب'' بھی ملک میں بے امنی پیدا کرنے والوں کے خلاف ہے جس میں پاکستان کو بہت کامیابیاں مل چکی ہیں۔ انہوں نے کہا کہ 2013 میں ہم نے ملکی معیشت کا استحکام اور سماجی شعبے کی ترقی کے منشور کے تحت انتخابات میں حصہ لیا، اسی منشور کی وجہ سے وزیر اعظم نواز شریف کو عوام نے مینڈیٹ دیا جس کے باعث پاکستان نے 3 سال کا سفر نواز شریف کی قیادت میں ڈیڑھ سال میں طے کیا ہے۔

اسحاق ڈار کا کہنا تھا کہ آج کا پاکستان گزرے کل کے پاکستان سے بہت اچھا ہے، حکومت کے ٹھوس اقدامات کی وجہ سے مختصر وقت میں اہداف حاصل کر رہے ہیں اور یہی وجہ ہے کہ ہمارے زرمبادلہ کے ذخائر 16 ارب ڈالر سے تجاوز کرگئے ہیں جب کہ عالمی مارکیٹ میں خام تیل کی قیمت کم ہونے سے عام آدمی کو فائدہ پہنچا۔ انہوں نے کہا کہ حکومت توانائی کے مسئلے کو حل کرنے پر بھی بھرپور توجہ دے رہی ہے اور 2017 میں بجلی کی طلب اور رسد میں فرق ختم ہوجائے گا جب کہ کاروبار کے لئے بھی سازگار موحول فراہم کر رہے ہیں۔