وہ دن دور نہیں جب تمام دہشت گرد عناصر کا خاتمہ کر دیا جائے گا وزیر اعظم

ایسے بزدلانہ اقدامات دہشت گردی کے خلاف ہمارا عزم متزلزل نہیں کرسکتے، وزیر اعظم نواز شریف فوٹو: فائل

---

وزیر اعظم نواز شریف نے کہا ہے کہ وہ دن دور نہیں جب تمام دہشت گرد عناصر کا خاتمہ کر دیا جائے گا۔

وزیر اعظم نواز شریف نے ایک بیان میں لورالائی میں فورسز اور کراچی میں پولیس بس پر حملے کی شدید مذمت کرتے ہوئے کہا کہ قانون نافذ کرنے والے اداروں کی قربانیاں رنگ لائیں گی۔ انہوں نے دونوں حملوں میں قیمتی جانوں کے ضیاع پر گہرے دکھ اور افسوس کا اظہار کرتے ہوئے کہا کہ ایسے بزدلانہ اقدامات دہشت گردی کے خلاف ہمارا عزم متزلزل نہیں کرسکتے اور وہ دن دور نہیں جب تمام دہشت گرد عناصر کا خاتمہ کر دیا جائے گا۔

واضح رہے کہ لانڈھی میں مرغی خانہ اسٹاپ پر پولیس وین کے قریب حملے میں اسپیشل سیکیورٹی یونٹ (ایس ایس یو) کے 2 اہلکار جاں بحق اور 14 زخمی ہوئے جب کہ گزشتہ روز لورالائی پولیس موبائل پر دہشت گردوں کے حملے میں ایس ایچ او سمیت 5 اہلکار جاں بحق اور ایک زخمی ہوگیا تھا۔