گوجر خان میں ماڈل ایان علی کے والد پر قاتلانہ حملہ

بیٹی کی گرفتاری اور اس پر مقدمے کے بعد مجھ پر یہ تیسرا حملہ ہے، زخمی محمد حفیظ فوٹو: فائل

---

نامعلوم ملزمان کی فائرنگ سے ماڈل ایان علی کے والد محمد حفیظ زخمی ہوگئے۔

ایکسپریس نیوز کے مطابق ایان علی کے والد محمد حفیظ گوجر خان سے اپنی بیٹی سے ملنے راولپنڈی کچہری آرہے تھے کہ راستے میں نامعلوم موٹر سائیکل سوار ملزمان نے ان کی گاڑی پر فائرنگ کردی جس کے نتیجے میں وہ زخمی ہوگئے، محمد حفیظ کو فوری طور پر تحصیل ہیڈ کوارٹر اسپتال لے جایا گیا جہاں انہیں ابتدائی طبی امداد فراہم کئے جانے کے بعد راولپنڈی کے بے نظیر اسپتال منتقل کردیا گیا جہاں ان کی حالت خطرے سے باہر بتائی جاتی ہے۔

دوسری جانب زخمی محمد حفیظ نے ایکسپریس نیوز سے خصوصی گفتگو کرتے ہوئے بتایا کہ بیٹی کی گرفتاری اور اس پر مقدمے کے بعد یہ ان پر تیسرا حملہ ہے، پہلا حملہ 19 مارچ کو کیا گیا اور مجھ سے کہا گیا کہ مقدمے کی پیروی چھوڑ دوں تاہم میرے انکار پر 23 مارچ کو مجھ پر دوبارہ حملہ کیا گیا۔