سارہ لورین کی فلم ’’برکھا‘‘ پاکستان میں ریلیز کرنے کیلیے امپورٹرز کے رابطے

’’برکھا‘‘ ایک منفرد موضوع پربنائی گئی فلم ہے جس کی کہانی اورمیوزک پرخاص توجہ دی گئی تھی، سارہ لورین فوٹو : فائل

---

معروف اداکارہ وماڈل سارہ لورین کی بالی ووڈ میں ریلیز ہونے والی نئی فلم '' برکھا '' کو پاکستان میں ریلیزکرنے کے لیے غیرملکی فلموں کے امپورٹرز نے رابطے کرلیے۔

فلم کونارتھ کے علاقہ میں زبردست رسپانس ملا ہے جب کہ ممبئی اور دہلی سمیت دیگر بڑے شہروں میں بھی فلم بینوں کی بڑی تعداد نے فلم کودیکھا اور اس میں سارہ لورین کی اداکاری کے ساتھ ساتھ راحت فتح علی خاں کی آواز میں گائے گیت کو بھی خاصا پسند کیا ہے۔ یہی وجہ ہے کہ اب پاکستان میں فلم کو امپورٹ کرکے ریلیزکرنے کے خواہش مندوں نے سارہ لورین کے ذریعے فلم کے پروڈیوسر سے معاملات کو طے کرنے کے لیے بات چیت شروع کردی ہے۔

واضح رہے کہ پاکستان میں بالی ووڈ اسٹارز کی فلمیں اب زیادہ تر بھارت کے ساتھ بیک وقت ہی نمائش کے لیے پیش کی جاتی ہیں لیکن کچھ فلموں کو امپورٹ مسائل کی وجہ سے ریلیز کے بعد بھی نمائش کے لیے پیش کیا گیا ہے اوران کو اچھا رسپانس بھی ملا ہے۔ اس سلسلہ میں سارہ لورین نے ''ایکسپریس'' کو بتایاکہ بالی ووڈ اسٹارز کی فلموں کے لیے اب پاکستان بھی ایک بہت بڑی مارکیٹ کی شکل اختیار کر چکا ہے۔ بالی ووڈ فلموں کو پسند اور دیکھنے والوں کی بڑی تعداد پاکستان میں بستی ہے اسی لیے میری فلم کو بھی پاکستان میں نمائش کے لیے غیرملکی فلموں کے امپورٹرز نے رابطے کیے ہیں۔

مجھے امید ہے کہ آئندہ چند روزمیں معاملات کو طے کرلیا جائے گا۔ اس کے علاوہ فلم کو بھارت کے بعد مغربی ممالک اور امریکا میں بھی نمائش کے لیے پیش کیا جائے گا جس کے لیے فلم کے پروڈیوسراور ڈائریکٹر نے دوسرے ممالک کے ڈسٹری بیوٹرز سے معاہدے کرلیے ہیں۔

انھوں نے بتایا کہ ''برکھا'' ایک منفرد موضوع پربنائی گئی فلم ہے جس کی کہانی اورمیوزک پرخاص توجہ دی گئی تھی۔ یہ میری بالی ووڈ میں پہلی ٹائٹل فلم تھی اس لیے میں نے اپنے کردارکوحقیقت کے قریب تر پیش کیا ہے اسی لیے تو'' برکھا '' کی کہانی اور میوزک شائقین کی توجہ کا مرکزبنا ہوا ہے جہاں تک میری بات ہے تو فلم میں میری اداکاری کی وجہ سے ملنے والے رسپانس کو مدنظررکھتے ہوئے مجھے مزید دو فلموں میں کام کرنے کی پیشکش ہوئی ہے۔