جعلی دستخط کیس کی تحقیقات کا دائرہ وسیع ہونے پر نئے انکشافات متوقع

کیس کی تحقیقات جاری ہے لیکن اب تک کوئی گرفتاری عمل میں نہیں آئی ہےلیکن مزید کئی سنسنی خیز انکشافات متوقع ہیں، رائع

Raheel Salman April 07, 2015

کیس کی تحقیقات جاری ہے لیکن اب تک کوئی گرفتاری عمل میں نہیں آئی ہے لیکن مزید کئی سنسنی خیز انکشافات متوقع ہیں، ذرائع فوٹو: فائل

سندھ پولیس کے اعلیٰ افسران کے جعلی دستخط کے معاملے کی تحقیقات کا دائرہ مزید وسیع کردیا گیا ہے جس میں کئی نئے انکشافات سامنے آئے ہیں، معاملے میں حیدرآباد واندرون سندھ کے کئی رینجرزاہلکار بھی ملوث پائے گئے ہیں جن میں جعلی دستخط کے ماہر2 کلرک بھی شامل ہیں۔

سینٹرل پولیس آفس کے 12 ملازمین نے شارع فیصل پر واقع ریسٹورنٹ میں صورتحال سے نمٹنے کی حکمت عملی مرتب کرلی، کئی اہلکاروں نے ضمانت قبل ازگرفتاری کرالی جبکہ ایک اہلکار طویل رخصت پر چلا گیا، تفصیلات کے مطابق چند روز قبل سندھ پولیس کے اعلیٰ افسران کے جعلی دستخط کی بنیاد پر ملازمت پر بحالی کا انکشاف ہوا تھا، واقعے کامیٹھادر تھانے میں مقدمہ الزام نمبر 68/15 درج کیا گیا تھا ، معاملے کی تحقیقات کا دائرہ وسیع کیا گیا توسینٹرل پولیس آفس میں قائم لاجسٹک ڈپارٹمنٹ کے علاوہ حیدرآباد اور اندرون سندھ سمیت کئی رینجرز اہلکار بھی ملوث پائے گئے ہیں۔

سینٹرل پولیس آفس کے مزید 2 کلرکس عبداللہ اور اسرارکوبھی تحقیقات میں شامل کرلیا گیا ہے، دونوں کلرکس جعلی دستخط کرنے کے ماہر بتائے جاتے ہیں جبکہ حیدرآباد رینجرز کے سب انسپکٹر علی حسن کو معطل کرکے سی پی او رپورٹ کرنے کا حکم دے دیا گیا ہے، اس سلسلے میں ذرائع نے ایکسپریس کوبتایا کہ سینٹرل پولیس آفس کے 12 افراد نے چند روز قبل شارع فیصل پر عوامی مرکزکے قریب قائم ایک ریسٹورنٹ میں ''اجلاس'' منعقد کیا جس میں مذکورہ صورتحال سے نمٹنے کی حکمت عملی تیار کی گئی، اس ضمن میں کئی افراد نے ضمانت قبل از گرفتاری کرالی ہے جبکہ ایک کلرک شاہنواز نے ایک ماہ کی چھٹی لے لی ہے، شاہنواز بھی جعلی دستخط کا ماہر بتایا جاتا ہے جس نے3 آرڈر جاری کیے تھے، ذرائع نے بتایا کہ کیس کی تحقیقات جاری ہے، اب تک کوئی گرفتاری عمل میں نہیں آئی ہے لیکن مزید کئی سنسنی خیز انکشافات متوقع ہیں۔