امید ہے ایران حوثی باغیوں کی حمایت سے دستبردار ہوجائے گا سعودی وزیرخارجہ

ایران کے کردار نے مسئلے کو بگاڑ دیا ہے اوراس کی وجہ سے ملک میں تشدد کے واقعات میں نمایاں اضافہ ہوا،شہزادہ سعود الفیصل. فوٹو:فائل

---

سعودی عرب کے وزیر خارجہ شہزادہ سعود الفیصل کا کہنا ہے کہ ایران اور سعودی عرب حالت جنگ میں نہیں اور امید ہے کہ ایران یمن میں حوثی باغیوں کی حمایت سے دستبردار ہوجائے گا۔

دارالحکومت ریاض میں فرانسیسی وزیرخارجہ لوراں فابینس کے ہمراہ مشترکہ پریس کانفرنس کرتے ہوئے سعودی وزیرخارجہ کا کہنا تھا کہ یمن میں ایران کے کردار نے مسئلے کو بگاڑ دیا ہے اوراس کی وجہ سے ملک میں تشدد کے واقعات میں نمایاں اضافہ ہوا ہے جب کہ عرب اتحاد نے یمنی صدر منصور ہادی کی دعوت پر حوثی باغیوں کے خلاف کارروائی کا آغاز کیا۔ انہوں نے کہا کہ یمن میں مجاذ اتھارٹی کے دفاع کے لئے گئے اس لئے ایران ہمیں یمن میں لڑائی ختم کرنے کے لئے نہیں کہہ سکتا۔

سعودی وزیر خارجہ نے کہا کہ خطے کی سیکیورٹی میں اضافے کے لئے رواں ماہ ایران کے ساتھ جوہری پروگرام کے تنازعے پر 6 بڑی طاقتوں کے درمیان طے پانے والے فریم ورک پر روسی ہم منصب سے بات ہوئی اور امید ہے کہ یہ خطے کی سیکیورٹی کے لئے اہم قدم ثابت ہوگا۔ اس موقع پر فرانسیسی وزیرخارجہ نے سعودی عرب کی قیادت میں یمن میں حوثی باغیوں کے خلاف فضائی مہم کی حمایت کا اظہار بھی کیا۔