وزیراعظم یمن کی صورت حال پر آج شام پالیسی بیان جاری کریں گے

یمن کی صورت حال پر پارلیمنٹ کی قرارداد کی منظوری کے بعد متحدہ عرب امارات اورعرب لیگ نے پاکستان پر شدید تنقید کی تھی۔ فوٹو:فائل

---

وزیراعظم نوازشریف یمن کی صورت حال پر آج شام اہم بیان جاری کریں گے۔

وزیراعظم کے ترجمان کی جانب سے جاری اعلامیے کے مطابق وزیراعظم نواز شریف یمن اور سعودی عرب کے معاملے پر آج اہم بیان جاری کریں گے جو کہ شام ساڑھے 6 بجے سرکاری ٹی وی سے نشر کیا جائے گا۔

اس سے قبل وزیراعظم کی سربراہی میں اعلیٰ سطح کا اجلاس جاری ہے جس میں آرمی چیف جنرل راحیل شریف، وزیردفاع خواجہ آصف، مشیر خارجہ سرتاج عزیز ، معاون خصوصی طارق فاطمی اور سیکریٹری خارجہ شریک ہیں۔ اجلاس میں یمن ،سعودی عرب صورت حال پر غور کیا جارہا ہے۔

واضح رہے کہ پارلیمنٹ کی جانب سے یمن کی جنگ میں فریق نہ بننے سے متعلق قرارداد کی منظوری کے بعد متحدہ عرب امارات کے وزیر خارجہ اور عرب لیگ کی پارلیمنٹ کے چیئرمین نے پاکستان پر شدید تنقید کی تھی۔