سعودی عرب کو یقین دلاتے ہیں کہ ہم ان کے شانہ بشانہ کھڑے ہوں گے وزیراعظم

مشکل وقت میں دوست ممالک کو تنہا نہیں چھوڑیں گے،وزیراعظم، فوٹو: پی آئی ڈی

---

FAISALABAD: وزیراعظم نوازشریف نے کہا ہے کہ سعودی عرب ہمارا اہم اسٹریٹیجک اتحادی ہے اورانہیں یقین دلاتے ہیں کہ ہم ان کے شانہ بشانہ کھڑے ہوں گے۔

یمن کی صورتحال پر پالیسی بیان دیتے ہوئے وزیراعظم نوازشریف کا کہنا تھا کہ حکومت نے مشرق وسطیٰ کی صورتحال کا مختلف پہلوؤں سے جائزہ لیا، پارلیمنٹ کی مشترکہ قرارداد حکومتی پالیسی کے مطابق ہے تاہم خلیجی اتحادی اس قرارداد کو صحیح طورپر نہ سمجھ سکے، قرارداد کے بعد بھی کئی قسم کے بیانات سامنے آئے اور یمن کی صورتحال پر میڈیا میں بھی بہت کچھ سنا اور اس حوالے سے بہت کچھ واضح کرنا ضروری ہے۔

وزیراعظم نوازشریف نے یمن میں انسانی حقوق کی تیزی سے بگڑتی ہوئی صورتحال پر شدید تشویش کا اظہار کرتے ہوئے کہا کہ پاکستان یمن میں حوثیوں کی کارروائیوں کی مذمت کرتا ہے، یمن کی قانونی حکومت کو پرتشدد انداز میں ختم کرنا ایک خطرناک مثال ہے اور اس سے پورے خطے کو سنگین خطرات لاحق ہو گئے ہیں لہٰذا یمن کا مسئلہ مذاکرات کے ذریعے حل کرنا چاہتے ہیں۔ انہوں نے کہا کہ پاکستان حرمین شریفین کے تقدس کو بڑی اہمیت دیتا ہے اور اُن کے خادمین کی مکمل حمایت کرتا ہے جب کہ سعودی عرب ہمارا اہم اسٹریٹیجک اتحادی ہے اس کی خودمختاری اور سالمیت ہماری خارجہ پالیسی کا بھی اہم حصہ ہے ہم اس کے کندھے سے کندھا ملا کر چلیں گے اورسعودی عرب کی سالمیت کو کوئی خطرہ ہوا تو اس کا سخت جواب دیں گے۔

وزیراعظم نے پالیسی بیان میں کہا کہ ہم بلاشک وشبہ خلیجی ریاستوں کے ساتھ کھڑے ہیں اور اس مشکل وقت میں دوست ممالک کو تنہا نہیں چھوڑیں گے،زمینی صورتحال کا جائزہ لینے کے لیے سعودی عرب اور خلیج تعاون کونسل کے دیگر ممالک کے ساتھ مسلسل رابطے میں ہیں اور انہیں یقین دلاتے ہیں کہ ہم ان کے شانہ بشانہ کھڑے ہوں گے۔ انہوں نے کہا کہ پاکستان یمن بحران حل کرنےکے لیے سعودی عرب کی قیادت سے آئندہ دنوں میں سفارتی کوششیں تیز کرے گا جب کہ ہم نے ایران پر حوثی باغیوں کو مذاکرات کی میز پر لانے میں کردار ادا کرنے کے لیے زور دیا ہے، ہم یمن میں منصور ہادی کی حکومت کی بحالی پر یقین رکھتے ہیں کیونکہ ان کی حکومت کی بحالی امن کی طرف ایک اہم قدم ہوگا۔

واضح رہے کہ پارلیمنٹ کی جانب سے یمن کی جنگ میں فریق نہ بننے سے متعلق قرارداد کی منظوری کے بعد متحدہ عرب امارات کے وزیر خارجہ اور عرب لیگ کی پارلیمنٹ کے چیئرمین نے پاکستان پر شدید تنقید کی تھی۔