حاضر سروس شوہر

ریحام خان کی بطور سفیر تقرری کیا خان صاحب کی ڈکشنری میں ’نیپوٹزم‘ اور ’اقربا پروری‘ کے معنوں پر اب پوری نہیں اترتی؟

جاہد احمد April 16, 2015

ریحام خان کی نامزدگی کو تحریکِ انصاف کے کارکنان کو ٹھیک اسی طرح رد کردیا جانا چاہیے جیسا کہ محترمہ مریم نواز کے سلسلے میں کیا گیا۔ فوٹو: فائل

FAISALABAD: خدانخواستہ محترمہ مریم نواز کہیں پنجاب کی صوبائی حکومت کی جانب سے سڑک چھاپ بچوں کے حقوق کی آگاہی کے حوالے سے صوبائی سفیر کی طرز کے کسی عہدے پر نامزد کر دی جاتیں تو پاکستان تحریک انصاف کس حد تک سینہ کوبی کرتی اور آہ و بکا مچاتی یہ تصور کرنا مشکل بات نہیں!

اس لئے اب تصور کیجئے اور دل ہی دل میں مسکرا کر بات وہیں دبا دیجئے گا۔ کیونکہ مسکراہٹ دل سے بڑھ کر ہونٹوں پر پھیلی اورآپ کی بیگم کی نظر کی زد میں آئی تو یقیناً سوال تیر کی طرح اُڑتا چلا آئے گا کہ کیوں صاحب کس کو یاد کرکے مسکرائے جاتے ہیں؟

بیگم خان کی خیبر پختونخوا حکومت کی جانب سے سڑک چھاپ بچوں کے حقوق کی آگاہی کے حوالے سے صوبائی سفیرکے طور پر نامزدگی اور سال سوا سال پہلے تک مریم نواز صاحبہ کی بطور سربراہ یوتھ لون اسکیم تقرری پر خان صاحب کی شعلہ بیانیوں و 'نیپوٹزم' کے نعروں میں نظر آنے والا عملی تضاد صرف اتنا ثابت کرتا ہے کہ اب خان صاحب کی حیثیت سیاسی قائد کے ساتھ ساتھ دیگر شادی شدہ حضرات کی طرح ایک عدد حاضر سروس شوہر کی بھی ہے۔

https://twitter.com/AdvocateQamar/status/587426552738004992

اِس فیصلے کہ بعد یہ قیاس بھی مشکل نہیں کہ بیگم صاحبہ کے سامنے خان صاحب کی اتنی ہی چلتی ہوگی جتنی تاریخ کے بڑے بڑے سورماوں سمیت کسی بھی قسم کے شوہروں کی اپنی بیگمات کے سامنے چلتی رہی ہے! بلاشبہ شادی شدہ افراد کے لئے یہ خبرمسکراہٹ کا سبب ہے اور بڑی بڑی باتیں بھگارنے والے غیر شادی شدہ مَردوں کے لئے باعثِ عبرت۔

ریحام خان صاحبہ کی مذکورہ صوبائی سفیر کے طور پر تقرری کیا خان صاحب کی مرتب کردہ ڈکشنری میں 'نیپوٹزم' اور لغت کے مطابق 'اقربا پروری' کے معنوں پر اب پوری نہیں اترتی؟ جبکہ ابھی چند دن پہلے تک مریم نواز صاحبہ کی تقرری بطور سربراہ یوتھ لون اسکیم وزیراعظم نواز شریف کے لئے اسی نیپوٹزم اور اقربا پروری کی بنیاد پر طعنہ بن چکی تھی۔

Why #RehamKhan a breaking news? Why even in headline news? Why even a news? Moreover, #PTI against family politics
— نالائق (@RajaArsalanKhan) April 12, 2015

تب بجا طور پر اِس عمل کے خلاف پاکستان تحریک انصاف کے ایک رہنما نے کیس عدالت میں دائر بھی کیا اور پھر اسی دوران درست فیصلہ کرتے ہوئے محترمہ مریم نواز نے اپنے عہدے سے استعفی دے کر مستقبل کے حوالے سے اہلِ اقتدار اور عوام کے لئے اچھی مثال قائم کی تھی۔ اِس فیصلے سے یقینی طور پر مثبت دور کے آغاز کی اُمید دکھائی دینے لگی تھی جہاں مقتدر طبقہ ایسی ناقص روایات کو عوامی و سیاسی سطح پر مخالفت اور ردِعمل کے خوف سے ترک کرنے پر تیار نظر آنے لگا تھا۔

لیکن پھر ہوا یوں کہ انقلاب آیا، چند مہینوں اور ایک عدد ریکارڈ ساز دھرنے کے بعد خان صاحب کی زندگی میں حقیقی تبدیلی آگئی یا سلیس اردو میں یوں کہیے کہ حضرت پھر سے دولہا بن بیٹھے۔ اب کون سا نیپوٹزم اور کہاں کی اقربا پروری! بھلا بیگم کی خواہشات کی تکمیل کبھی نیپوٹزم یا اقربا پروری بھی گردانی جاتی ہیں؟ کم عقل راقم! یہ نیپوٹزم نہیں رن مریدی ہے! رن مریدی۔ بیگم کی خواہشات تو اعلی ظرف شوہر کے لئے حکم کا درجہ رکھتیں ہیں۔ کیونکہ ہر فرمانبردار شوہر یہ جانتا اور مانتا ہے کہ جنت ماں کے قدموں تلے نہیں بلکہ بیگم کے آنچل تلے ہے حضور۔

#KPK apoints #RehamKhan as street children ambassador another disappointment frm #PTI so much for merit
— Omer Salman (@OmerSalman6) April 12, 2015

یقیناً محترمہ ریحام خان کی اس عہدے پر نامزدگی کوپاکستان تحریکِ انصاف کے کارکنان کی جانب سے ٹھیک اسی طرح رد کردیا جانا چاہیے جیسا کہ محترمہ مریم نواز کے سلسلے میں کیا گیا، مزید براں اُمید کرنی چاہیے کہ حکومتی جماعت کے قائد کی بیگم کی اس حکومتی نامزدگی کو کسی کارکن کی طرف سے کسی بھی طریقے اور کسی بھی بنیاد پر درست عمل نہیں گردانا جائے گا۔ تحریک انصاف کے کارکنان کو اپنے رہنما کے سکھائے ہوئے موتی جیسے رہنما اصولوں ہی کی بنیاد پر ان سے اس بارے ضرور سوال کرنا چاہئے کہ اے رہنما یہ بھی ایک عدد یوٹرن ہے یا کہ نیپوٹزم کی اصطلاح بیگمات پر عائد نہیں ہوتی یا پھر پاکستان تحریک انصاف کو اقربا پروری کے معاملات پر ہر قسم کا استثنٰی حاصل ہے!

Nomination of #Rehamkhan is totally based on merit because she the wife of #Imrankhan #PTi #Merit
— Pashtun Khan (@Pashtun_khan) April 15, 2015

ضروری ہے کہ کارکنان انقلابی نوعیت کے جوابات وصول کرکے سیر حاصل دلائل تیار کرلیں کیونکہ انہی کارکنان اور پیروکاروں نے روز مرہ کی بنیادوں پر متنوع پلیٹ فارموں سے اپنے لیڈر کے انقلابی احکامات، اقوالِ زریں، پُرمغز فیصلوں اور حیران کن اقدامات کا بھرپور دفاع کرنا ہوتا ہے۔ لیکن کوئی بھی دلیل تیار کرنے سے پہلے یہ خیال کیا جانا بہرحال ضروری ہے کہ حکومتی عہدہ حکومتی عہدہ ہی ہوتا ہے چاہے اختیارات اور کام کے حوالے سے اس کی نوعیت کسی بھی قسم کی ہو!

#RehamKhan chairing an event at CM house is simply a joke & a tight slap on the faces of #PTI supporters! #PTIBunchOfLiars #PMLN #KPK
— Rana Umair (@ranaumair2) April 12, 2015

بیگم خان براڈکاسٹنگ اور میڈیا کے شعبہ میں تجربہ اور اچھی شہرت رکھتی ہیں! اسی لئے اگر انہیں کام کرنے کی خواہش ہے تو پہلے کی طرح اپنا کام جاری رکھ سکتی ہیں اور اگر مقصد سیاست میں شوہر کا ہاتھ بٹانا یا عوامی و سماجی خدمات سرانجام دینا ہے تو بھی کوئی بندش نہیں کیونکہ ان کے پاس یہ امور سرانجام دینے کے لئے اب قابلِ ذکر غیر حکومتی پلیٹ فارم موجود ہیں۔ پر حکومتی جماعت کے قائد کی اہلیہ ہونے کے ناطے ایسی کسی خدمات کے نام پر بھی حکومتی نوعیت کی نامزدگیوں و عہدوں سے دور رہنا اس طور بہتر فیصلہ ہے کہ اقربا پروری کا خاتمہ اور اس مشق سے دوری ان کے شوہر کی پالیسی اور سیاسی لائحہ عمل کا حصہ ہے۔جبکہ عملی طور پر بہت سے حضرات انہی خطوط پر خان صاحب کے عتاب کا شکار بھی ہوئے ہیں۔

بہتر یہی ہے کہ بیگم صاحبہ خان صاحب کے اقوال پر عمل پیرا ہونے کے مقصد سے اور درست روایات کو آگے بڑھاتے ہوئے محترمہ مریم نواز کی طرح اپنی اس نامزدگی سے اصولی بنیادوں پر معذرت کرتے ہوئے صوبائی سفیر کے عہدے سے بجا طور پر سبکدوش ہو جائیں اس بات سے قطع نظر کہ تکنیکی بنیادوں پر وہ اس نامزدگی کے لئے مکمل اہلیت رکھتی ہیں یا نہیں۔

[poll id="359"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس بھی بھیجے جاسکتے ہیں۔

تبصرے

کا جواب دے رہا ہے۔ X

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔

حاضر سروس شوہر

انٹرٹینمنٹ

شوٹنگ پر نہ پہنچنے والے نامور بھارتی اداکار کی لاش فلیٹ سے برآمد

کولڈ پلے کنسرٹ میں شاہ رخ خان کا چرچا، سوشل میڈیا پر دھوم مچ گئی

سیف علی خان پر حملے کے بعد کرینہ کپور کا پہلا بیان سامنے آگیا

رائے

اسپیشل انسان!

سامراج کا کھیل

ٹرمپ کی تقریبِ حلف برداری یا جشنِ تاجپوشی؟

متعلقہ

تازہ ترین

حاضر سروس شوہر

ہمارے ساتھ شامل ہوں

مقبول خبریں

انٹرٹینمنٹ

شوٹنگ پر نہ پہنچنے والے نامور بھارتی اداکار کی لاش فلیٹ سے برآمد

کولڈ پلے کنسرٹ میں شاہ رخ خان کا چرچا، سوشل میڈیا پر دھوم مچ گئی

سیف علی خان پر حملے کے بعد کرینہ کپور کا پہلا بیان سامنے آگیا

رائے

اسپیشل انسان!

سامراج کا کھیل

ٹرمپ کی تقریبِ حلف برداری یا جشنِ تاجپوشی؟

متعلقہ

تازہ ترین