مونٹی کارلو ماسٹرز ٹینس مونفلز کے ہاتھوں راجر فیڈرر کا قصہ تمام ہوگیا

مونٹی کارلو ماسٹرز ٹینس ٹورنامنٹ میں جائلز مونفلز نے ورلڈ نمبر 2 سوئس اسٹار راجر فیڈرر کا قصہ تیسرے ہی راؤنڈ میں تمام کردیا ، دفاعی چیمپئن اسٹینسلاس واورنیکا، جو ولفریڈ سونگا، روبرٹو بتیستا، جون اسنر اور ٹومی روبریڈو بھی شکست کے بعد ٹورنامنٹ سے باہر ہوگئے۔

تفصیلات کے مطابق عالمی نمبر 2 سیکنڈ سیڈڈ سوئس اسٹارراجر فیڈرر کو14 سیڈ فرنچ جائلز مونفلز نے 6-4 اور 7-6(7/5) سے مات دے کر بڑا اپ سیٹ کردیا،4 مرتبہ فائنل ہارنے والے فیڈرر تقریباً چار ہفتے قبل انڈین ویلز فائنل میں نووک جوکووک سے مات کے بعد پہلی مرتبہ اس ایونٹ میں حصہ لے رہے تھے۔ عالمی نمبر9 اورساتویں سیڈڈ واورنیکا کو بلغاریہ کے9 سیڈ گریگور دیمیتروف نے صرف 54 منٹ میں ہی6-1 اور 6-2 سے زیر کرلیا۔ واورنیکا نے میڈرڈ میں2013 ورلڈ ٹور ماسٹرز کلے کورٹ سمیت دیمیتروف کیخلاف گذشتہ 2مقابلوں میں کامیابی حاصل کی تھی۔


کروشیا کے مارن کلک نے فرنچ پلیئر جو ولفریڈ سونگا پر 6-3، 7-6(7/5) سے غلبہ پایا، جمہوریہ چیک کے ٹوماس بریڈچ نے اسپین کے روبرٹو بتیستا کو 7-6(9/7) اور 6-4 سے زیر کیا، اسپین کے تھرڈ سیڈڈ رافیل نڈال نے امریکی 15 سیڈ جون اسنر کو سخت مقابلے کے بعد (8/6) 7-6، 4-6 اور 6-3 سے قابو کیا،کینیڈا کے4 سیڈڈ مائلوس راؤنک نے اسپین کے16 سیڈڈ ٹومی روبریڈو کو 6-3، 3-6 اور 6-3 سے شکست دی۔دوسری جانب بوگوٹا ویمنز ٹینس ٹورنامنٹ میں ابھرتی ہوئی اسٹار ایلینا سویٹولینا نے ڈانکا کوینک کو 6-3 اور 6-1 سے شکست دے کر کوارٹر فائنل میں جگہ بنالی ہے۔

سویٹولینا کا لاسٹ 8 میں انتظار کرنے والی آٹھوں سیڈ ایرینا فالکونی نے دینا فزنمائر کا قصہ تین سیٹس میں 5-7، 6-2 اور 6-3 سے تمام کیا تھا۔ دیگر مقابلوں میں ٹیلیانا پریرا نے کوالیفائر مینڈی منیلا کو 7-5 اور 7-5 جبکہ لورڈیز ڈومنگوئز لینو نے ایک اور کوالیفائر برٹز ہاداد مایا کو7-6(5) اور 6-0 سے مات دی۔