دہشت گردی کے خلاف جنگ میں تعاون جاری رہے گاچینی صدر کی عسکری قیادت کو یقین دہانی

ہر چیلنج میں پاکستان کے ساتھ کھڑے ہوں گے، چینی صدر، فوٹو:آئی ایس پی آر

---

ISLAMABAD: ترجمان پاک فوج کے مطابق چینی صدرشی چن پنگ نے تینوں مسلح افواج کے سربراہان سے ملاقات کی جس میں انہوں نے خطے میں امن کے لیے پاک فوج کی کوششوں کو سراہتے ہوئے دہشت گردی کے خلاف جنگ میں پاکستان سے تعاون جاری رکھنے کی یقین دہانی کرائی۔

ترجمان پاک فوج میجر جنرل عاصم سلیم باجوہ کے مطابق چینی صدر سے ہونے والی اس اہم ملاقات میں چیرمین جوائنٹ چیفس اسٹاف کمیٹی جنرل راشد محمود، آرمی چیف جنرل راحیل شریف، نیول چیف ایڈمرل ذکااللہ اور ایئرچیف مارشل سہیل امان بھی شریک تھے۔



ملاقات میں چینی صدر نے دہشت گردی کے خاتمے اور امن کے لیے پاک فوج کی کوششوں کو سراہا اور آپریشن ضرب عضب میں حاصل ہونے والی کامیابیوں پر خراج تحسین پیش کیا۔







پاک فوج ترجمان کا کہنا تھا کہ چینی صدر نے آپریشن ضرب عضب کو انتہائی اہم اور گیم چینجر قرار دیتے ہوئے کہا کہ آپریشن پاکستان کی اقتصادی ترقی میں اہم کردار ادا کرے گا۔ ترجمان کے مطابق چینی صدر شی چن پنگ نے عسکری قیادت کو دہشت گردی کے خلاف جنگ میں تعاون جاری رکھنے کا یقین دلاتے ہوئے کہا کہ چین ہر معاملے میں پاکستان کے ساتھ ہے اور ہر چیلنج میں بھی اس کے ساتھ کھڑے ہوں گے۔