جھنگ میں ٹرک مکان میں جاگھسنے سے 7 بچے جاں بحق 2 بچوں سمیت 4 افراد زخمی

واقعے کے بعد جائے حادثہ پر امدادی کارروائیاں شروع کردی گئی اور کرین کے ذریعے مکان کا ملبہ ہٹا کر لاشوں کو نکالا گیا۔ فوٹو: فائل

---

NEW DEHLI: رنگ روڈ پر پنڈی محلہ کے قریب ٹرک بے قابو ہوکر مکان میں جاگھسا جس کے نتیجے میں 7 بہن بھائی جاں بحق جب کہ 2 بچوں سمیت 4 افراد زخمی ہوگئے۔

ایکسپریس نیوز کے مطابق جھنگ میں رنگ روڈ پر پنڈی محلہ کے قریب سبزی سے بھرا ہوا ٹرک بے قابو ہوکر مکان میں جاگھسا جس کے نتیجے میں 7 بہن بھائی جاں بحق جب کہ 2 بچے اور والدین زخمی ہوگئے، واقعے کے بعد جائے حادثہ پر امدادی کارروائیاں شروع کردی گئی اور کرین کے ذریعے مکان کا ملبہ ہٹا کر لاشوں کو نکالا گیا جب کہ زخمیوں کو ڈسٹرکٹ ہیڈ کوارٹر اسپتال منتقل کردیا گیا جہاں انہیں طبی امداد فراہم کی جارہی ہے۔

اس المناک حادثے کے بعد پورا علاقہ سوگ میں ڈوب گیا اور جہاں بچوں کا والد غم سے نڈھال ہے تو وہیں ماں اپنے جگر کے ٹکڑوں کو کھونے کے بعد ہوش و حواس کھو بیٹھی ہے جب کہ پولیس کا کہنا ہے کہ ٹرک ڈرائیور سمیت 3 ملزمان کو گرفتار کرلیا گیا ہے۔