عمران خان کو ایک الیکشن کا افسوس ہے لیکن ہمارا مینڈیٹ ہر بار چوری ہوا آصف زرداری

بھارت کو کہتا ہوں کہ کشمیروں کو تنگ کرنے سے باز آجائے، شریک چیئرمین پی پی پی۔ فوٹو: آئی این پی

---

سابق صدر اور پیپلزپارٹی کے شریک چیئرمین آصف زرداری کا کہنا ہے کہ کپتان کو ایک الیکشن کا افسوس ہے لیکن ہمارا مینڈیٹ ہر بار چوری ہوتا ہے تاہم ہرالیکشن کے بعد پیپلزپارٹی نئے ولولے سے زندہ ہوتی ہے۔

لیاری کے ککری گراؤنڈ میں جلسے سے خطاب کرتے ہوئے آصف علی زرادری کا کہنا تھا کہ پیپلزپارٹی سیاسی جماعت نہیں بلکہ ایک فلسفہ ہے اور ہم عوامی خدمت کے لئے سیاست کرتے ہیں اور یہ خدمت ہمیشہ کرتے رہیں گے، ایک زمانہ تھا جب ہم لیاری میں سڑکوں پر گھوما کرتے تھے لیکن مشرف کی باقیات نےلیاری کوخون کی ہولی میں تبدیل کردیا۔ انہوں نے کہا کہ 2 سال بعد الیکشن ہونے والے ہیں اور پارٹی کو مزید مضبوط بنانے کے لئے اسے نوجوانوں کے ہاتھ میں دیں گے،نوجوان نسل پارٹی قیادت سنبھالے وزیراعلی سید قائم علی شاہ اورمیں حکومت سنبھالیں گے جب کہ بلاول اور آصفہ کے آنے تک پارٹی کا جھنڈا سنبھالے رکھوں گا۔



پیپلزپارٹی کے شریک چیئرمین نے کہا کہ میں نے اسلام آباد میں ساری سیاسی جماعتوں کو اکٹھا کرکے یہ فیصلہ کیاہے کہ چین سے آنے والی سرمایہ کاری کو ڈی ریل نہیں ہونے دیا جائے گا اور چین کے تعاون سے شروع کیے جانے والے منصوبوں کو سیاسی نہیں بننے دیاجائے گا، بلوچوں اور پشتونوں کے حقوق کاتحفظ کیا جائے گا،اگر وہ یہ سمجھتے ہیں کہ ان منصوبوں سے ان کے علاقوں میں نئی آباد کاری ہوگی اوروہ اقلیت بن جائیں گے تو ہم انہیں اقلیت نہیں بننے دیں گے،ہم نے 18 ویں آئینی ترمیم میں اس کا پہلے سے بندوبست کر لیا ہے، بلوچوں، پشتونوں، سندھیوں، پنجابیوں کو ان منصوبوں سے خوف نہیں ہونا چاہیے،ان منصوبوں سے کسی کو نقصان نہیں ہو گابلکہ سب کا فائدہ ہو گا، ہم ماؤزے تنگ اوربھٹو کے فلسفہ کے ساتھ ترقی کرنا چاہتے ہیں۔



انہوں نے کہا کہ میں10 بارچین گیا اور چین کے ساتھ دوستی کو بڑھایا ،اب چین کے ساتھ دوستانہ تعلقات کے ساتھ ساتھ تجارتی تعلقات بھی ہوں گے، آنے والی نسلوں کیلیے یہ بہت ضروری ہے ،میں یہ سوچتا تھا کہ اپنی آنے والی نسلوں کا مستقبل کیسے محفوظ کیا جائے ،چین ہمارا واحد دوست ہے جس نے وعدے کیے اور معاہدے کیے، ہماری کوششیں اور جدوجہد رنگ لا رہی ہیں۔





موجودہ حکومت کے ڈھائی سال پورے ہو چکے ہیں ،ڈھائی سال کے بعد دوبارہ الیکشن ہوںگے، میں کہتا ہوں کہ پارٹی کومضبوط کریں اور حوصلہ رکھیں،سیاست اور پارٹی کی کمان نوجوانوں کے ہاتھوں میں ہونی چاہیے،میں شاہ صاحب سے کہتا ہوں کہ وہ اور میں اپنا کام کریں،ہم حکومت چلائیں اور پارٹی نوجوان چلائیں،جب بلاول اور آصفہ بھٹو زرداری یہاں آ جائیں گے تو پھر ان کاتاریخی استقبال ہو گا اور جئے بھٹو اور جئے بے نظیرکے نعرے ہوں گے،ہم اندرون سندھ اور پنجاب کے کسانوں اورمحنت کشوں کے مسائل سے آگاہ ہیں،ان کے حل کے لیے کوششیں کریں گے۔انہوں نے کہا کہ لیاری سے جلسوں کا آغاز ہواہے،میں پنجاب، جنوبی پنجاب، ملتان، کشمیر، گلگت بلتستان اور پورے ملک میں جلسے کروں گا،ہم نے آئندہ الیکشن کے لیے سفر شروع کردیاہے،پیپلز پارٹی ہرموڑپرلڑے گی، لوگوں کے حقوق،اپنے دوستوں اورکراچی کے عوام کیلیے لڑے گی،پیپلز پارٹی ایسی پارٹی ہے،جس میں کوئی فرق نہیں ہے، پشتون، سندھی، بلوچ نئے سندھی ، ہندو اور ہر قسم کے لوگ اس پارٹی میں موجود ہیں،ہم سرائیکی ، بلوچوں اور پشتونوں کا تحفظ کرتے ہیں۔





آصف علی زرداری نے جلسہ عام سے خطاب کے دوران لیاری کی ترقی کیلیے ایک ارب روپے کے نئے ترقیاتی پیکیج کااعلان کیا اور کہا کہ یہ وزیر اعلیٰ سندھ کی طرف سے میرے ذریعے لیاری کے لیے تحفے ہیں۔ انہوں نے لیاری میں بلاول بھٹوانجینئرنگ کالج قائم کرنے،لیاری کے عوام کے لیے کم لاگت ہاؤسنگ اسکیم کے ذریعے فلیٹس بنانے اور ڈیلی ویجز ملازمین کو مستقل کرنے کااعلان کیا۔ آصف علی زرداری نے کہاکہ لیاری میں3ماہ میں پانی کی قلت ختم ہو جائے گی ،مجھے معلوم ہے کہ لیاری میں پانی کابحران ہے، میں نے یہ بحران ختم کرنے کیلیے وزیر اعلیٰ سندھ کو3ماہ کاوقت دیاہے۔ کشمیر کے حوالے سے سابق صدر کا کہنا تھا کہ بھارت کو کہتا ہوں کہ کشمیروں کو تنگ کرنے سے باز آجائے اگر انڈیا کے مسلمانوں نے مسئلہ کشمیر کو اٹھادیا تو بھارت کے لئے مشکلات کھڑی ہوجائیں گی۔



پاکستان پیپلزپارٹی کے شریک چیئرمین نے اپنے خطاب کے دوران ٹی وی چینلز پر زبردست تنقید کی اور کہا کہ یہ نئے بینڈ باجے والے آگئے ہیں، یہ ٹی وی والے آج نکلے ہوئے ہیں۔ ایک نئی صنعت بن چکی ہے، جسے ٹی وی کہتے ہیں، اس صنعت میں بیٹھ کرلوگ مال بیچتے ہیں اورمنفی پروپیگنڈا کرتے ہیں ۔ میں ان سے کہتا ہوںکہ اللہ سے ڈرو، خداکا خوف کرو، ایسی باتیں کروجس سے قومیں آگے بڑھیں ۔ ایسی باتیں نہ کروجس سے قوم میں انتشار پیداہو۔



وزیر اعلیٰ سندھ سیدقائم علی شاہ نے جلسے سے خطاب کرتے ہوئے کہا کہ میں لیاری والوں کی جدوجہداور قربانی کوسلام پیش کرتا ہوں ،پیپلزپارٹی آج بھی اتنی ہی مقبول ہے ، جتنی شہید ذوالفقار علی بھٹو اور شہید بے نظیر بھٹو کے زمانے میں تھی،نہ ہم لیاری والوں کو چھوڑیں گے اور نہ لیاری والے ہمیں چھوڑیں گے ،لیاری اور پیپلز پارٹی کا ایک لازوال رشتہ ہے ،جسے کوئی نہیں توڑ سکتا ۔پیپلزپارٹی سندھ کے سیکریٹری جنرل تاج حیدر نے کہا کہ سندھ کو تقسیم کرنے کی بات چھوڑدی جائے ،سندھ ہمیں سے ایک ہے اور ایک رہے گا،تعصب کی سیاست کر لی ، اب محبت کی سیاست کی جائے۔