فوجی آپریشن ملک میں استحکام لارہے ہیں سربراہ پاک فوج

پاکستان کے اندر اور باہر قیام امن ہماری ترجیح ہے اور کسی بھی چیلنج کا مقابلہ کرنا ناممکن نہیں، جنرل راحیل شریف ، فوٹو:فائل

---

آرمی چیف جنرل راحیل شریف نے کہا ہے کہ دہشت گردی کے خلاف جاری جنگ میں کامیابیوں کی وجہ سے ملک میں استحکام واپس آرہا ہے جب کہ فاٹا میں دہشت گردی کے خاتمے پر سے توجہ نہیں ہٹائی جاسکتی۔

ترجمان پاک فوج میجر جنرل عاصم سلیم باجوہ کے مطابق آرمی چیف جنرل راحیل شریف نے کور ہیڈ کوارٹر بہاولپور کا دورہ کیا اور جوانوں و افسران سے ملاقات کرکے دہشت گردی کے خلاف جنگ میں ان کی پیشہ وارانہ کامیابیوں اور قربانیوں کو خراج تحسین پیش کرتے ہوئے ان کے حوصلے کی بھی تعریف کی۔





اس موقع پر خطاب کرتے ہوئے جنرل راحیل شریف نے کہا کہ پاکستان کے اندر اور باہر قیام امن ہماری ترجیح ہے اور کسی بھی چیلنج کا مقابلہ کرنا ناممکن نہیں۔



پاک فوج کے سربراہ کا کہنا تھا کہ فاٹا میں دہشت گردی کے خاتمے پر سے توجہ نہیں ہٹائی جاسکتی وہاں موجود دہشت گردوں کا ملک کے باقی حصوں سے رابطہ توڑ رہے ہیں جب کہ علاقے میں موجود دہشت گردوں کا ان کے خاتمے تک پیچھا کرتے رہیں گے۔





جنرل راحیل شریف نے کہا کہ دہشت گردی کے خلاف جاری جنگ میں کامیابیوں کی وجہ سے ملک میں استحکام واپس آرہا ہے، ہمیں ملک بھرسے دہشت گرد گروپوں کا نیٹ ورک ختم کرکے پاکستان کو آگے بڑھانا ہے۔ ان کا کہنا تھا کہ پاکستان کے نوجوان ہمارا سب سے قیمتی سرمایہ ہیں اس لیے ان کی حوصلہ افزائی اور عزت کی جانی چاہئے۔