لاہور ہائیکورٹ نے 2کم عمربھائیوں کی پھانسی روک دی

لاہور ہائیکورٹ راولپنڈی بینچ کے جسٹس محمود مقبول باجوہ نے تھانہ جہلم میں قتل کیس میں پھانسی کے منتظر2 قیدی نابالغ بھائیوں سکندر اور جمشیدکی پھانسی کی سزا پر عملدرآمد روک دیا اور ڈسٹرکٹ اینڈ سیشن جج جہلم کو حکم دیا ہے کہ وہ میڈیکل بورڈ تشکیل دے کر یہ تعین کرائیں کہ قتل کے واقعے کے وقت دونوں ملزمان کم عمر تھے یا نہیں، اگرکم عمری کی رپورٹ ہو تو ملزمان کی سزا پھانسی سے تبدیل کرکے عمر قید کردی جائے۔


ثنا اللہ زاہد ایڈووکیٹ کا موقف تھا کہ دستاویزات کے مطابق دونوں ملزم بھائی کم عمر ہیں، قانون کے مطابق کم عمر بچوں کو پھانسی نہیں دی جا سکتی، پھانسی کی سزا کالعدم قرار دی جائے۔ این این آئی کے مطابق اسلام آباد ہائیکورٹ کے جسٹس اطہر من اللہ نے شفقت حسین کی سزائے موت پر عملدرآمدکیس کا فیصلہ پیر تک محفوظ کر لیا۔ شفقت حسین کے وکیل نے عدالت میں استدعا کی کہ ہم نے سزا کو نہیں طریقہ کارکو چیلنج کیا ہے، ان کے موکل کی عمرکے تعین کے لیے جوڈیشل کمیشن تشکیل دیا جائے۔