نادان میڈیا

ٹاک شوز کا تماشا اصلاح کی غرض سے نہیں بلکہ ریٹنگ اور ایک دوسرے پر سبقت لے جانے کے حصول کے لئے کیا جاتا ہے۔

کاشف اعوان May 14, 2015

سانحہ صفورا گوٹھ کو سامنے رکھتے ہوئے ٹی وی چینلز کے رویے کا تجزیہ کریں آپ کو خود ہی اندازہ ہوجائے گا کہ ابھی طرم خان میڈیا اور طرم خان صحافی نادان ہیں۔ فوٹو: فائل

لاہور: میڈیا کو کسی بھی ریاست کا ستون سمجھا جاتا ہے لیکن بدقسمتی سے ناجانے ہمارے اس ستون کو کیا ہوگیا جو ہروقت عمارت کو گرانے کی کوشش میں لگا رہتا ہے، کوئی قومی سانحہ ہو یا المیہ بس ٹی وی چینلز کو موضوع مل جاتا ہے جس پر گھنٹوں گھنٹوں وقت صرف کیا جاتا ہے لیکن بدقسمتی یہ ہے کہ وہ سب کھیل تماشا اصلاح کی غرض سے نہیں بلکہ ریٹنگ اور ایک دوسرے پر سبقت لے جانے کے حصول کے لئے کیا جاتا ہے۔

میڈیا کا کردار معاشرے کی اصلاح کے لئے ہونا چاہیئے تھا لیکن بدقسمتی سے اصلاح تو درکنار اصلاح کے راستے سے گزرنا بھی شاید عوام کی عدم دلچسپی تصور کیا جاتا ہے اور قومی سانحہ پر وہی تماشا لگایا جاتا ہے جس سے مخالف چینل پر برتری حاصل کی جاسکے۔

پاکستان صحافت کی دنیا میں ایک ناکام ملک ہے، وجہ جھوٹا پروپیگنڈا اور جیب گرم رکھنے کی عادتیں #blackjourno #yellowjournalism #pakistanimedia
— Political Rola (@Syasi_Rola) May 11, 2015

ماضی میں ہونے والے تمام المیے بھول جائیے کیوںکہ ان کو گزرے کئی ماہ و سال بیت گئے اور حالیہ قومی سانحہ صفورا گوٹھ کو سامنے رکھتے ہوئے ٹی وی چینلز کے رویے کا تجزیہ کریں آپ کو خود ہی اندازہ ہوجائے گا کہ ابھی طرم خان میڈیا اور طرم خان صحافی نادان ہیں کیوں کہ وہ نہ تو بلوغت کی عمر میں آنا چاہتے ہیں اور نہ اپنی ذمہ داریوں کا احساس کرنا چاہتے ہیں۔ شاید یہی وجہ ہے کہ مادر پدر آزادی نے ٹی وی چینلز کو اتنا آزاد بنادیا ہے کہ براہ راست نشریات میں کچھ بھی کہہ دیا جائے نہ تو چینل کا احتساب ہوتا ہے اور نہ ہی بیان دینے والے کا۔

سانحہ صفورا گوٹھ کے فوری بعد تمام میڈیا چینلز نے وہ تماشا لگایا جس نے عام فرد کو بھی سوچنے پر مجبور کردیا کہ آخر ٹی وی چینلز پر کس قسم کی دوڑ لگی ہوئی ہے؟ کسی چینل نے سانحہ کے بعد مختلف مکاتب فکر کے علماء کو بٹھا کر دہشتگردی کی اس کارروائی کو مذہبی رنگ دینے کی کوشش کی تو کسی نے حکومت مخالف جماعت کے رہنما سے تجاویز لینا شروع کردیں اور پھر سانحہ کے بعد اس کی روک تھام اور آئندہ اس قسم کے سانحات سے نمٹنے کے لئے تجاویز آنے کے بجائے ایک دوسرے پر الزامات در الزامات کا سلسلہ شروع ہوگیا۔

#SafooraChowrangi: A new opportunity for Pakistani Azad #Media to attack civilian govts/representatives and praise COAS.
— Junaid Qaiser جنید قیصر (@JunaidQaiser) May 13, 2015

میڈیا چینلز نے یہ بھی دکھایا کہ کراچی میں اتنا بڑا سانحہ ہوگیا لیکن وزیراعظم اور وزراء اسلام آباد میں بیٹھے کھانا اڑاتے رہے۔ بھلا اُنہیں کون بتائے کہ اسلام آباد میں طے شدہ میٹنگ میں ملک کی تمام سیاسی جماعتوں کے رہنماؤں کو پاک چین اقتصادی راہداری پر اعتماد میں لیا جانا تھا جس میں مہمانوں کے لئے ہلکے پھلکے ریفریشنمنٹ کا اہتمام بھی کیا گیا اور ظاہر سی بات ہے کہ یہ اہتمام سانحہ کے بعد نہیں بلکہ سانحہ سے قبل کیا گیا تھا۔

لیکن نادان ٹی وی چینلز کو یہی نظر آیا کہ کراچی میں قومی سانحہ رونما ہوا اور وزیراعظم وزراء کے ساتھ اسلام آباد میں کھانا اڑاتے رہے۔ اس قدر افسوس کی بات ہے کہ میڈیا کی اس قسم کی رپوٹنگ دیکھتے ہوئے سوشل میڈیا پر بھی میڈیا کی زبان ہی بولی گئی۔ ٹوئٹر اور فیس بک پر بھی میڈیا کی خبروں کو عین سچ قرار دیتے ہوئے اسی پر بحث جاری رہی۔ یہی نہیں وزیراعلی سندھ سید قائم علی شاہ کی حکومت سے لاکھ اختلاف سہی ان کی کاردگی بھی یقیناً قابل تنقید ہے لیکن اگر وہ اسلام آباد سے براہ راست صفورا گوٹھ پہنچے تو ٹی وی چینلز نے ان کے لباس پرغیر ضروری تنقید کرنا شروع کردی کہ سائیں سرکار کاٹن کے کپڑے پہن کر جائے وقوعہ پہنچے، اب بھلا کیا سائیں سرکار کو پہلے گھر جاکر کالے کپڑے پہن کر جائے وقوعہ کا دورہ کرنا چاہیئے تھا؟ مطلب حد ہی ہوگئی یہ تو۔

Incapable govt,Typical response.
Blood flows in #SafooraChowrangi as imbecile parliamentarians gobble up delicacies. #shameless
— Tweety (@The5thRebel) May 14, 2015

یہ تو تمام چیزیں حادثے کے چند گھنٹے بعد کی تھیں لیکن رات 8 بجے سے 11 بجے کے درمیان ہونے والے ٹاک شوز کا جائزہ لیں تو نابالغ میڈیا کے مزید انوکھے کارنامے دکھائی دیں گے۔ کئی چینلز پر مخالف جماعتوں کے رہنماؤں کو بٹھایا گیا اور پھر وہی پرانے سوال اور سیاسی رہنماؤں کو لڑانے کا پرانا طریقہ اور صد افسوس ان نابالغ سیاسی رہنماؤں کا جو میزبان کے سوال پر آستینیں چڑھا کر منہ سے جھاگ نکال کر ایک دوسرے کی کرپشن اور اسکینڈلز کو لے کر اسی پر جملے بازی کرتے رہے اور میزبان خاموشی سے تماشا دیکھتے رہے۔

یہ سب کچھ صفورا گوٹھ سانحے کے بعد ہونے والے ٹاک شوز کی کہانی ہے اورآپ اس سے قبل ہونے والے قومی سانحات اور اس کے بعد ہونے والے ٹاک شوز نکال کر دیکھ لیجیے آپ کو یہی منظر تمام ٹاک شوز میں دکھائیں دیں گے، ماضی کے پروگراموں میں بھی وہی سوال اور وہی جھگڑے ملیں گے.

Have news channels started showing images with mournful music, excitedly telling ppl how they "broke" this news first? #SafooraChowrangi
— Irshad Ataka (@irshadataka) May 13, 2015

اگر نہیں ملے گا تو آئندہ کے لائحہ عمل کے حوالے سے کوئی مثبت بحث یا بحث سے حاصل ہونے والا کوئی اصلاحی نتیجہ، اگر کسی پروگرام میں آپ کو یہ مل جائے تو سمجھ لیجیے گا کہ میڈیا نادانی سے دانائی کی طرف سفر پر گامزن ہوچکا ہے اور ٹی وی چینلز ریٹنگ کے چکر سے نکل کر حقیقی طور پر ریاست کا ستون بن رہے ہیں جو عمارت کو گرانے کے لئے نہیں بلکہ مضبوط بنانے کے لئے کام کر رہے ہیں۔

[poll id="417"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس