پوری قوم ملالہ یوسف زئی کے لئے دعا گو ہے

ملالہ یوسف زئی کی صحت یابی کے لئے نمازجمعہ کے بعد خصوصی دعائیں کرائی گئیں ، فوٹو: راشد اجمیری

---

پوری قوم پاکستان کی بہادربیٹی ملالہ یوسف زئی کے لئے دعا گو ہے۔

ملالہ یوسف زئی کی صحت یابی کے لئے ملک بھر میں خصوصی دعاؤں کا سلسلہ جاری ہے اس سلسلے میں ایوان وزیراعلیٰ لاہور میں ملالہ یوسف زئی کے لئے ''یوم دعا'' کی تقریب کا اہتمام کیا گیا جس میں رکن قومی اسمبلی پرویز ملک ، سرکاری افسران اور شہریوں نے بڑی تعداد میں شرکت کی ، اس موقع پر وزیراعلی پنجاب شہباز شریف نے ملالہ یوسف زئی کی جلد صحت یابی کے لئے خصوصی دعا کی جبکہ پنجاب بھرمیں سرکاری دفاتر، تعلیمی اداروں ،مسلم لیگ(ن) کےدفاتر،مساجد اور اقلیتوں کی عبادت گاہوں میں ملالہ یوسف زئی کی صحت یابی کے لئے خصوصی دعائیں کی گئیں۔ ملالہ یوسف زئی کے لئے ملتان میں بھی ینگ نرسز کی جانب سے شمعیں روشن کر کے ان کی جلد صحت یابی کے لئے دعا کی گئی۔

خیبرپختونخو حکو مت کی اپیل پر یوم دعا کے موقع پر اسکولوں اور کالجوں میں خصوصی دعاؤں کا اہتمام کیا گیا جبکہ سول سیکرٹریٹ میں صوبائی وزرا اور سرکاری ملازمین نے بھی ایک منٹ کی خاموشی اختیار کی اور مساجد میں نمازجمعہ کے موقع پر ملالہ کی صحت یابی کے لئے خصوصی دعائیں بھی کی گئیں۔

سندھ،بلوچستان،آزادکشمیر،گللگت بلتستان سمیت ملک کے دیگرعلاقوں میں بھی نمازجمعہ کے بعد ملالہ یوسف زئی کی صحت یابی کے لئے خصوصی دعائیں کرائی گئیں۔