سانحہ صفورا میں ملوث 4 ملزمان کو گرفتار کرلیا گیا وزیراعلیٰ سندھ

سانحہ صفورا میں 46 افراد جاں بحق جب کہ 9 افراد زخمی ہوئے تھے فوٹو: فائل

---

وزیر اعلیٰ سندھ قائم علی شاہ نے کہا ہے کہ سانحہ صفورا میں ملوث 4 ملزمان کو گرفتار کرلیا گیا ہے جنہوں نے اپنے جرم کا اعتراف بھی کرلیا ہے۔

نواب شاہ میں میڈیا سے بات کرتے ہوئے وزیر اعلیٰ سندھ کا کہنا تھا کہ سانحہ صفورا کی تحقیقات میں پیش رفت ہورہی ہے اور واقعے میں ملوث 4 ملزمان کو گرفتار کرلیا گیا ہے، یہ ملزمان واقعے کی سازش کی تیاری اور اس کی منصوبہ بندی میں ملوث تھے جب کہ چاروں ملزمان نے اعتراف جرم بھی کرلیا ہے۔

واضح رہے کہ گزشتہ ہفتے کراچی کے علاقے صفورا گوٹھ کے قریب دہشت گردوں نے بس میں گھس کرفائرنگ کردی تھی جس کے نتیجے میں 46 افراد جاں بحق اور 9 زخمی ہوگئے تھے۔ جاں بحق افراد میں 17 خواتین بھی شامل تھیں۔