گرمی لوڈشیڈنگ اور حکومت بھائی واہ

قوم کو لوڈ شیڈنگ مبارک ہو، مگر ہمارے حکمران اس عظیم نعمت سے محروم ہیں، خدا جلد ہی ان کو بھی اس نعمت سے مستفید فرمائے۔

انعم احسن May 25, 2015

اگر لوڈ شیڈنگ کے حوالے سے موثر اقدامات نہ کئے گئے تو غربت، افلاس اور بیروزگاری کا سانپ ملکی معیشت کو نگل جائے گا۔ فوٹو: فائل

KARACHI: پاکستان کے اقتصادی، صنعتی اور زرعی مسائل میں ایک اہم اور بنیادی مسئلہ بجلی کے بحران کا ہے۔ آئے روز مہنگائی کے بڑھتے ہوئے طوفان اور بجلی کے بحران نے معصوم عوام کا دن کا سکون اور رات کی نیندیں غارت کر رکھی ہیں۔

پاکستان مسلم لیگ ن کا اقتدار میں آنا اگرچہ خوش آئند تھا لیکن اس حکومت کے آنے سے اب تک جو تبدیلی آئی ہے وہ محض اتنی ہے کہ اب بجلی طے شدہ شیڈول کے مطابق وقت پر آتی ہے اور مقررہ اوقات میں بند بھی ہوتی ہے۔ نتیجہ یہ نکلا کہ عوام نے خود کو ہی لوڈشیڈنگ کے مطابق ڈھال لیا ہے۔ عوام نے بجلی کے استعمال کے اوقات کار مختص کر لئے ہیں ۔

اب تو صورت حال یہ ہوگئی ہے کہ جب کوئی نیا بجلی کا منصوبہ شروع ہو یا نیا پاور پلانٹ لگے تو عوام بجائے خوشی اور مسرت کا اظہار کرنے کے اپنا سا منہ لیکر بیٹھ جاتے ہیں۔ جس کی وجہ یہ ہے کہ اُنہیں بجلی کی پیداور میں اضافے کے ساتھ ساتھ بجلی کی قیمتوں میں اضافے کا ایک فطری سا خوف بھی لاحق ہوجاتا ہے کہ اب ہر نئے پاور پلانٹ کے ساتھ عوام کو اس بجلی کی قیمت بھی ادا کرنی ہوگی جو اِن پاور پلانٹس کی بدولت بنائی ہی نہیں جاتی، آدھی رقم بجلی کی اور آدھی رقم لوڈشیڈنگ کی۔ گمان ہوتا ہے کہ آئندہ چند سالوں تک اگر یہی صورت حال رہی تو حالات اور بجلی کے بحران کا شکار عوام مستقبل میں اپنے بچوں کا نام برقی آلات کے ناموں پر نہ رکھ دیں جیسے گیزر خان، ٹیوب لائٹ بانو، واپڈا پروین، وائرنگ مرزا اور میٹر چوہدری وغیرہ سے پکاریں گے۔

#loadshedding is coming #Pakistan pic.twitter.com/t5TFf7X0rT
— F@H@D (@FahadRanaJamil) May 22, 2015

الیکشن سے قبل عوام کے سامنے جی حضوری کرنے والے حکمران عوام کا دل جیتنے کیلئے انہیں سبز باغ دکھاتے ہیں لیکن حقیقت حکمرانوں کے اقتدار میں آنے کے بعد واضح ہوتی ہے۔ قوم بھی سوئی پڑی ہے۔ آخر اِن حکمرانوں کا محاسبہ کون کرے گا؟ عوام کی منتخب کردہ نمائندے ہی ملک کو دونوں ہاتھوں سے لوٹ کر کھا رہے ہیں۔ معصوم بچوں پر خودکش حملوں کے ذریعے موت برسائی جارہی ہے، وطن کو ٹکرے ٹکرے کرنے کی سازش ہورہی ہے لیکن ہماری قوم سو رہی ہے، مگر لوڈشیڈنگ کی وجہ سے یہ قوم بپھر کر باہر نکلتی ہے اور اپنے ہی دیس کی املاک کو تباہ و برباد کرکے رکھ دیتی ہے۔ اِس تناظر میں ہم اس حقیقت کو بھلا نہیں سکتے کہ پاکستان اس وقت شدید عالمی دبائو میں ہے۔

ہمارے عوام بھی کچھ انتہا قسم کے ہیں۔ سمجھتے ہیں ووٹ دے دیا اور حق ادا کردیا۔ اسی طرح ہمارے حکمران بھی کچھ زیادہ ہی فرض شناس ہیں، اقتدار میں آنے کے بعد آنکھیں اس طرح ماتھے پر دھر لیتے ہیں گویا خادم نہیں بادشاہ ہیں۔ اب گرمیاں مکمل جوبن پر ہیں، عوام الناس کو لوڈ شیڈنگ گرمیوں کے خوبصورت تحفے کے طور پر دے دی گئی ہے اور اِس تحفے میں خاطرخواہ اضافے کی توقعات کا اظہار بھی کیا جارہا ہے۔ عوام کی توقعات بام پر بیٹھی چڑیا کی مانند چونچ ہلا رہی ہیں۔ اب قوم سولہ سولہ گھنٹے اندھیروں میں امید کا دیا جلاکر تو گزارہ نہیں کرسکتی ۔

Hamara roshan #Pakistan aj tak roshani ke liyeh rota raha..... #loadshedding
— Çavaller Ôbscur (@LaeeQ_) May 23, 2015

اہل وطن کو لوڈ شیڈنگ مبارک ہو، مگر ہمارے حکمران اس عظیم نعمت سے محروم ہیں، دعا تو یہی ہے کہ خدا جلد ہی ان کو بھی اس نعمت سے مستفید فرمائے تاکہ یہ عوام اور حکمران کی تفریق تو ختم ہو۔ پاکستان میں لوڈشیڈنگ کے حوالے سے بہت سے لطائف مشہور ہیں امکان ہے کہ مستقبل قریب میں اردو محاورے کچھ اس طرح ڈھل جائیں گے ۔

'' جھوٹ بولنا ہو تو ۔۔۔۔۔ آج بجلی نہیں جائے گی

''ناممکن کے حصول کی خواہش ہو تو ۔۔۔۔۔ آج بجلی ضرورآئے گی ۔

''فخر محسوس کرنا ہو تو ۔۔۔۔۔ ہمارے یہاں پر تو بجلی ہے

لوڈشیڈنگ کے صرف نقصانات نہیں ہیں بلکہ کچھ اچھی اچھی باتیں بھی لوڈشیڈنگ کی مرہونِ منت ہیں۔ جیسے اسکی خود ساختہ خصوصیات بھی ہیں جیسا کہ بجلی جاتی ہے تو ساری فیملی کو کچھ وقت ساتھ میں ہوا لینے کو میسر آتا ہے، خدا کی یاد بارہا آتی رہتی ہے، خاموشی کی وجہ سے دماغ اور اعصاب کو آرام آتا ہے، پسینہ کی بدولت کولیسٹرول اور زائد چربی ختم ہوتی ہے، ساتھ ہی ساتھ لوڈشیڈنگ یو پی ایس اور جنریٹر کا کام کرنے والے افراد کے پیشوں کی آبیاری بھی کرتی ہے۔

Double sawari pabandi k bjaye #loadshedding pe pabandi lagaye jaye #karachi #pakistan
— Nazir Najeeb Kapadia (@DocNKapadia) October 28, 2014

دوسری جانب بجلی کے نرخوں میں مسلسل اضافے اور لوڈ شیڈنگ کی وجہ سے گزشتہ 10 برس سے صنعتی پیداوار میں شدید کمی آئی ہے اور بجلی کی قیمت میں اضافے سے صنعتی مصنوعات کی قیمتوں میں بھی اضافہ ہوا ہے۔ خصوصاََ عالمی منڈیوں میں ان کی مانگ میں کمی واقع ہورہی ہے اگر ہم نے تاخیر سے کام لیا تو پاکستان کی معیشت جو ابھی بیمار ہے نزع کے عالم میں چلی جائے گی اور اگر موثر اقدامات نہ کئے گئے تو غربت، افلاس اور بیروزگاری کا سانپ ملکی معیشت کو نگل جائے گا۔

جگا سکتی ہے شعر و شاعری قوموں کو غفلت سے

دعائیں ہم تو لیکن دیں گے اس بجلی کی قلت کو

نہیں اقبال نے جگایا قوم کو ہر گز

رکھا ہے واپڈا نے جس قدر بیدار ملت کو

[poll id="440"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس