سیاسی و عسکری قیادت کا قومی ایکشن پلان پر عملدرآمد یقینی بنانے کا اعادہ

اجلاس کے دوران عارضی طور پر بے گھر ہونے والے خاندانوں کی واپسی سے متعلق امور پر بھی تبادلہ خیال کیا گیا۔ فوٹو: پی آئی ڈی

---

وزیراعظم نواز شریف کی زیر صدارت اعلیٰ سطح کے اجلاس میں دہشت گردی کے خلاف نیشنل ایکشن پلان پر موثر عمل درآمد یقینی بنانے کے لئے اقدامات پر غور کیا گیا۔



ایکسپریس نیوز کے مطابق وزیراعظم نواز شریف کی زیر صدارت اجلاس میں آرمی چیف جنرل راحیل شریف، ڈی جی آئی ایس آئی میجر جنرل رضوان اختر، وفاقی وزیر داخلہ چوہدری نثار، وزیر دفاع خواجہ آصف اور وزیرخزانہ اسحاق ڈار کے علاوہ دیگر اعلیٰ سیاسی اور عسکری حکام نے بھی شرکت کی، اس موقع پر دہشت گردوں کے خلاف جاری آپریشن ضرب عضب میں پیش رفت کا جائزہ لیا گیا۔





اجلاس کے دوران نیشنل ایکشن پلان پر موثر عملدرآمد یقینی بنانے کیلئے اقدامات پر غور کیا گیا۔ اس کے علاوہ عارضی طور پر بے گھر ہونے والے خاندانوں کی واپسی سے متعلق امور پر بھی تفصیلی تبادلہ خیال کیا گیا۔

 





دوسری جانب یوم تکبیر کے موقع پر اپنے پیغام میں وزیراعظم نوازشریف نے کہا ہے کہ عالمی دباؤ کے باوجود ملکی مفاد کو مد نظر رکھ کر ایٹمی دھماکوں کا فیصلہ کیا، ایٹمی دھماکوں کی بدولت پاکستان کا دفاع ناقابل تسخیر ہوگیا اور اب کوئی بھی دشمن وطن عزیز کی طرف میلی آنکھ سے دیکھنے کی ہمت نہیں کرسکتا۔ ان کا کہنا تھا کہ یوم تکبیر پر ہمیں پاکستان کی وحدت اور سلامتی کے عہد کی تجدید کرنا چاہئے۔

وزیراعظم کا کہنا تھا کہ ہماری حکومت کو ایٹمی دھماکا کرنے کا اعزاز حاصل ہوا اور انشاءاللہ معاشی دھماکا بھی ہمارے دور حکومت میں ہی ہوگا۔ انہوں نے کہا کہ مضبوط دفاع کے لیے پاکستان کو اقتصادی لحاظ سے مضبوط بنانا ہوگا، پاک چین اقتصادی راہداری کا منصوبہ نہایت اہمیت کا حامل ہے اس کے ثمرات کے اثرات ملک کے ہر حصے تک پہنچیں گے۔ وزیراعظم نے اپنے پیغام میں مزید کہا کہ آپریشن ضرب عضب بے مثال کامیابیاں حاصل کررہا ہے، دہشت گردی کے خلاف پوری قوم یک زبان اور یک جان ہے جب کہ بد خواہ ملک کو اندرونی طور پر کمزور کرنے کی کوششوں میں ہیں۔