نائیجیریا میں مسجد کے باہر خود کُش حملے اور دیگر واقعات میں 27 افراد ہلاک

رواں برس کے آغاز میں بوکوحرام نے ملک کے شمال مشرق میں ایک وسیع علاقے پر قبضہ کر لیا تھا۔ فوٹو: اے ایف پی

---

KARACHI: نائیجیریا کے شہر میدوگوری میں مسجد کے باہر خودکش حملے اور دیگر واقعات میں 27 افراد ہلاک جب کہ متعدد زخمی ہوگئے ہیں۔

غیر ملکی خبر رساں ادارے کے مطابق نائیجیریا کے شمال مشرقی علاقے کے سب سے بے شہر میدوگوری میں واقع الحاجی ہارونا مسجد کے باہر عین اس وقت خودکش حملہ ہوا جب لوگ نماز ظہر کی ادائیگی کے بعد واپس نکل رہے تھے۔ واقعے کے نتیجے میں 18 افراد ہلاک جب کہ متعدد زخمی ہوگئے۔ مسجد پر حملے سے قبل قصبے کے رہائشی علاقوں پر راکٹ حملے بھی کئے گئے اس کے علاوہ نواحی گاؤں میں شادی کی ایک تقریب پر بموں سے حملہ کیا گیا جس کے نتیجے میں کم از کم 8 افراد ہلاک جب کہ 20 سے زائد زخمی ہوگئے۔ نائیجیریا میں برسرپیکار جنگجو تنظیم بوکو حرام نے میدوگوری اور اس کے نواحی علاقوں میں حملے کی ذمہ داری قبول کرلی ہے۔

واضح رہے کہ 20 لاکھ کی آبادی پر مشتمل میدوگوری شمال مشرقی نائیجیریا کا شورش کا شکار سب سے بڑا شہر ہے، رواں برس کے آغاز میں بوکوحرام نے ملک کے شمال مشرق میں ایک وسیع علاقے پر قبضہ کر لیا تھا تاہم نائیجیریا نے پڑوسی ملکوں کی مدد سے بوکو حرام کو ان علاقوں سے پسپا کردیا تھا۔