فرنچ اوپن میں نیشکوری کی کوارٹر فائنل میں رسائی

یوکرین کی الینا سویٹولینا نے آلیز کورنیٹ کو پچھاڑ کر فرنچ امیدوں کا چراغ گل کردیا۔ فوٹو: فائل

---

ایشین اسٹار کائی نیشکوری نے فرنچ اوپن کے کوارٹر فائنل میں رسائی حاصل کرکے 82 برسوں سے جاری جاپانی انتظار ختم کردیا، یوکرین کی الینا سویٹولینا نے فرنچ امیدوں کا چراغ آلیز کورنیٹ کو پچھاڑکر گل کردیا، اینا ایوانووک نے ایکٹرینا ماکارووا کو مات دیکر راؤنڈ 8 میں قدم رکھ دیے۔

تفصیلات کے مطابق سیزن کے دوسرے گرینڈ سلم فرنچ اوپن میں اتوار کو ایشین اسٹار کائی نیشکوری نے فرنچ اوپن کے کوارٹر فائنل میں رسائی حاصل کرکے 82 برسوں سے جاری جاپانی انتظار ختم کردیا، وہ رولینڈ گیروس پر اس مرحلے تک پہنچنے والے پہلے جاپانی پلیئر بن گئے، انھوں نے چوتھے راؤنڈ میں روسی حریف تیموریز گاباشیلوی کو 6-3، 6-4 اور6-2 سے شکست دی، نیشکوری سے قبل 1931 اور1933 میں جاپان کے جیروساتو نے پیرس ایونٹ کے سیمی فائنلز میں جگہ بنائی تھی، اس سے قبل نیشکوری کو تیسرے راؤنڈ میں فتح کیلیے کوئی محنت نہیں کرنا پڑی تھی کیونکہ ان کے مقابل آنے والے جرمن کھلاڑی بینجمن بیکر نے انجرڈ ہونے پر دستبرداری اختیار کرلی تھی، فرنچ اسٹار جوئے ولفریڈ سونگا نے جمہوریہ چیک کے ٹوماس بریڈیچ کو 6-3،6-2، 7-6(7/5)اور6-3 سے قابو کیا، اسٹینسلس واورنیکا نے جائلز سیمون پر 6-1،6-4 اور6-2 سے غلبہ پالیا۔

دوسری جانب ویمنز سنگلز میں دفاعی چیمپئن ماریا شراپووا اور لوسیا سفارووا کے درمیان چوتھے راؤنڈ کا میچ بارش کے سبب پیر تک ملتوی کردیاگیا، دیگر راؤنڈ16 میچز بھی اب اگلے دن منعقد ہوں گے، اس سے قبل مکمل ہونے والے فورتھ راؤنڈ مقابلوں میں 7 سیڈ اینا ایوانووک نے روسی حریف ایکٹرینا ماکارووا کو 7-5 ، 3-6 اور6-1 سے شکست دے دی، اینا نے 2008 میں ٹائٹل جیتنے کے بعد پہلی مرتبہ فرنچ اوپن کے کوارٹر فائنل میں رسائی حاصل کی، وہ راؤنڈ8 میں الینا سویٹولینا کا سامنا کریں گی جو رولینڈ گیروس ایونٹ کے کوارٹر فائنل میں جگہ بنانے والی پہلی یوکرینی کھلاڑی بنیں، الینا سویٹولینا نے آلیز کورنیٹ کو اسٹریٹ سیٹ میں پچھاڑکر کوارٹر فائنل میں جگہ بنالی۔

ان کی فتح کا اسکور6-2، 7-6 (11/9) رہا، سویٹولینا گرینڈ سلم کے کوارٹر فائنل میں جگہ بنانے والی دوسری یوکرینی پلیئر بنیں، ان سے قبل ان کی ہموطن کیٹرینا بوندرنیکو نے 2009 کے یوایس اوپن راؤنڈ8 میں قدم رکھے تھے،گذشتہ دن ٹاپ سیڈ سرینا ولیمز نے بیلاروسی حریف وکٹوریا آذرنیکا کو دلچسپ مقابلے کے بعد 3-6،6-4 اور6-2 سے مات دیکر پری کوارٹر فائنل میں جگہ بنائی تھی۔