ڈرون حملوں پرعمران خان کی تشویش کوسمجھ سکتا ہوں افغان صدر

افغان صدرحامد کرزئی نے کہا کہ انتہا پسندی اور دہشت گردی کو روکنے کی ذمہ داری دونوں ممالک پر عائد ہوتی ہے۔۔ فوٹو: فائل

---

افغان صدرحامد کرزئی نے کہا ہے کہ وہ ڈرون حملوں پر عمران خان کی تشویش کو اچھی طرح سمجھ سکتے ہیں۔

عمران خان کے نام لکھے گئے خط میں حامد کرزئی کا کہنا ہے کہ وہ عمران خان کی ڈرون حملے رکوانے سے متعلق کوششوں کو سراہتے ہیں اوردہشت گردی سے متعلق جنگ دونوں ممالک کومل کرلڑنی ہوگی۔

خط میں افغان صدر نے خطے میں جنگ اور انتہا پسندی سے متعلق اپنی تشویش کا بھی اظہار کیا اورکہا ہے کہ اس سلسلے میں انہوں نے مغربی قائدین سے بھی بات چیت کی ہےلیکن انتہا پسندی اور دہشت گردی کو روکنے کی ذمہ داری ہماری اپنی ہونی چاہئے۔

حامدکرزئی نے خط میں اس یقین کا بھی اظہارکیا کہ تحریک انصاف کے چیئرمین افغان حکومت کے ساتھ مل کرخطے میں قیام امن اور مستقبل کی بہتری کے لئے کوششیں جاری رکھیں گے۔