تمام اداروں کو جمہوریت کا احترام کرنا چاہئے وزیراعظم نوازشریف

منصوبہ بروقت اور شفاف انداز میں مکمل کر نے پر شہبازشریف کو مبارکباد دیتا ہوں،وزیراعظم، فوٹو:ایکسپریس نیوز

---

وزیراعظم نوازشریف نے کراچی میں گرین لائن بس سروس کے نام سے میٹرو بس منصوبہ شروع کرنے کا اعلان کرتے ہوئے کہا ہے کہ پاکستان نے ہمیشہ جمہوری دور میں ترقی کی لہٰذا تمام اداروں کو جمہویت کا احترام کرنا چاہیے۔





اسلام آباد میں میٹرو بس منصوبے کی افتتاحی تقریب سے خطاب کرتے ہوئے وزیراعظم نوازشریف نے کہا منصوبہ بروقت اور شفاف انداز میں مکمل کرنے پر شہبازشریف کو مبارکباد دیتا ہوں، میٹرو بس سے پنڈی اور اسلام آباد کے شہریوں کو با عزت سفر کی سہولت میسر ہوگی،عوام اس کو تفریح کے لیے بھی استعمال کریں گے جب کہ منصوبہ دیکھنے والے حیران نہ ہوں یہ بدلتا ہوا پاکستان ہے۔





وزیراعظم نے کہا کہ مختصرعرصے میں اس منصوبے کی تکمیل سے واضح ہوتا ہے کہ پاکستان اب ترقی کی نئی راہ پر چل پڑا ہے ورنہ یہاں 20 سال سے زائد عرصے میں بھی منصوبے مکمل نہیں ہوا کرتے۔ انہوں نے کہا کہ میٹروبس کی شفافیت پر کوئی انگلی نہیں اٹھاسکتا، ہماری حکومت بہت دیانتداری سے پاکستان کے وسائل عوام کے فلاح وبہبود پر خرچ کرے گی، ہم ملک سے 3 سال میں بجلی کی قلت کا خاتمہ کردیں گے جب کہ ہماری حکومت میں بجلی کی قیمتوں میں 2 سے 3 بار کمی ہوچکی ہے اور پیٹرولیم مصنوعات پر بھی عوام کو ریلیف فراہم کیا گیا۔





وزیراعظم نے کراچی میں بھی گرین لائن بس سروس کے نام سے میٹرو بس منصوبہ شروع کرنے کا اعلان کرتے ہوئے کہا کہ اس منصوبے سے کراچی کے عوام بھی پرسکون سفر کرسکیں، یہ منصوبہ عوام کی امانت ہے۔ انہوں نے کہا کہ شہباز شریف نیا پنجاب بنا رہے ہیں اور نئے پاکستان میں ہمارا ساتھ دے رہے ہیں اب اگلی میٹرو بس سروس ملتان میں شروع ہوگی جب کہ یہ سروس ہمارے منصوبوں اور کام کا ایک فیصد ہے اب لاہور سے کراچی تک موٹروے بھی بنے گی۔



وزیراعظم نوازشریف کا کہنا تھا کہ اقتصادی راہداری منصوبے کے مغربی روٹ کے لیے 30 ارب روپے آئندہ بجٹ میں رکھے گئے ہیں، نیشنل ایکشن پلان، ضرب عضب اور پاک چائنہ اقتصادی راہداری پر سب نے ہمارا ساتھ دیا جب کہ سیاسی قیادت آج بھی قومی یکجہتی کا مظاہرہ کررہی جس پر ان کا شکریہ ادا کرتا ہوں۔ انہوں نے کہا کہ پاکستان نے ہمیشہ جمہوری دور میں ترقی کی اور جنگیں ہمیں مارشل لا کے دور میں ہوئی ہیں اس لیے تمام اداروں کو جمہوریت کا احترام کرنا چاہئے۔





وزیراعظم نے کہا کہ جب ہم حکومت میں آئے تو امن وامان کا مسئلہ تھا لیکن ہم نے دہشت گردی کے خلاف فیصلہ کن جنگ کا آغاز کیا جس کے سبب کراچی کی روشنیاں بھی بحال ہورہی ہیں، شہر سے بھتہ خوری، اغواء برائے تاوان اور دیگر وارداتوں میں نمایاں کمی واقع ہوئی ہے اور شہر میں تیزی سے امن آرہا ہے جب کہ بلوچستان کے حالات میں بھی تبدیلی آرہی ہے۔ ان کا کہنا تھا کہ ہم آخری مجرم کے خاتمے تک چین سے نہیں بیٹھیں گے، دہشت گردوں اور دہشت گردی کو ختم کریں گے اور یہ جنگ ضرور جیتیں گے۔







اس سے قبل کنونشن سینٹر اسلام آباد میں میٹروبس سروس کے افتتاح کی پروقار تقریب منعقد ہوئی جس میں گورنر خیبرپختونخوا سردار مہتاب عباسی، گورنربلوچستان محمد خان اچکزئی، گورنر پنجاب رفیق رجوانہ، وزیراعلی بلوچستان ڈاکٹر عبدالمالک بلوچ، وزیراعلی خیبرپختونخوا پرویز خٹک، وزیراعلی پنجاب شہباز شریف ، وفاقی وزرا اور شہریوں کی بڑی تعداد نے شرکت کی۔





اس موقع پر وزیراعلیٰ پنجاب شہباز شریف نے کہا کہ آج ایک تاریخی دن ہے اس خوشی کے موقع پر چاروں صوبوں کی نمائندگی باعث اعزاز ہے لہذا قومی یکجہتی کےمنصوبے کو راولپنڈی اسلام آباد میٹرو بس کے بجائے پاکستان میٹروبس منصوبہ کہا جائے اور پاکستان کی ترقی کے لئے ملک کی چاروں اکائیاں مل کر کام کریں۔