ویسٹ انڈیز میں آسٹریلوی ٹیم عدم تحفظ کا شکار

کوریج کیلیے آنے والے رپورٹر کو نامعلوم افراد نے روسیو میں لہولہان کرکے لوٹ لیا

Sports Desk June 09, 2015

حکام نے سیکیورٹی بڑھاتے ہوئے کھلاڑیوں کوانتہائی محتاط رہنے کی ہدایت کردی فوٹو: اے ایف پی/فائل

ویسٹ انڈیز میں آسٹریلوی کرکٹ ٹیم عدم تحفظ کا شکار ہو گئی، حکام نے سیکیورٹی بڑھاتے ہوئے کھلاڑیوں کوانتہائی محتاط رہنے کی ہدایت کردی ، گذشتہ روز ٹیسٹ ٹور کی کوریج کیلیے آنے والے رپورٹر کو نامعلوم افراد نے روسیو میں لہولہان کرکے لوٹ لیا، اسی رات ایک کینگرو شائق کا بھی چوروں سے واسطہ پڑا۔

تفصیلات کے مطابق آسٹریلیا نے روسیو میں پہلے ٹیسٹ میں میزبان ویسٹ انڈیز کو صرف تین دن میں شکست دی تھی،اب اپنے ملک سے تعلق رکھنے والے ایک صحافی پر حملے کے بعد ٹیم پریشان ہوگئی ہے۔ یہ واقعہ گذشتہ روز پیش آیا جب ویب سائٹ ' کرک انفو' کے اسسٹنٹ ایڈیٹر ڈینیئل بریٹنگ پر ٹیم ہوٹل کے قریب ہی چاقوئوں سے لیس2 نامعلوم افراد نے حملہ کردیا، وہ اس وقت اے ٹی ایم سے کیش نکال رہے تھے،ڈاکوئوں نے انھیں نیچے گرایا اور والٹ و موبائل فونز بھی چھین لیے، اس دوران ان کے سر پر کٹ لگا، ناک پر چوٹ اور جسم کے مختلف حصوں پر خراشیں بھی آئیں۔

اس حملے سے قبل بریٹنگ کرکٹ آسٹریلیا کی ویب سائٹ کیلیے کام کرنے والے کیمرہ مین آندرے موگیر کے ساتھ تھے،اس بارے میں موگیر کا کہنا ہے کہ ہم نے ایک بار میں چند ڈرنکس لیں، پھر ڈینیئل اے ٹی ایم سے کیش نکالنے گئے تاکہ بل ادا کرسکیں، جب وہ 20 منٹ تک واپس نہیں آئے تو مجھے تشویش ہوئی، پھر وہ لہولہان بار میں داخل ہوئے ان کی حالت انتہائی خراب تھی جس پر فوری طور پر اسپتال لے جایا گیا۔

اسی رات روسیو میں ہی ایک اور واقعے میں ایک آسٹریلوی شائق کو بھی زدوکوب کرنے کے بعد لوٹ لیا گیا۔ ان واقعات نے آسٹریلوی کھلاڑیوں کی سیکیورٹی کے حوالے سے بھی خدشات پیدا کردیے۔ ٹیم منیجر گیون ڈووے نے تمام کھلاڑیوں کو واقعے سے آگاہ کرتے ہوئے انتہائی محتاط رہنے اور ٹیم ہوٹل سے تنہا باہر جانے سے گریز کرنے کی ہدایت دی ہے،پلیئرزکی سیکیورٹی میں بھی اضافہ کردیا گیا۔