پیرس ایئرشو میں پاکستان کو جے ایف 17 تھنڈرلڑاکا طیارے کا پہلا آرڈر مل گیا

جے ایف 17 تھنڈر طیارے کے آرڈر حاصل کرنے کے لئے پیرس ایئرشو اچھا مقام ہے، ایئرکموڈور خالد محمود، فوٹو : اے پی پی/فائل

---

ایئرشو کے دوران پاکستانی طیاروں کی جانب سے اپنی صلاحیتوں کے جوہر دکھانے کے بعد پاک فضائیہ کے جے ایف 17 تھنڈر کو ہاتھوں ہاتھ لینے کے لیے پہلا معاہدہ طے پاگیا۔

پیرس ایئرشو کے دوران پاکستان میں تیار کردہ لڑاکا طیارے جے ایف 17 نے شاندار جوہر دکھائے جس کے بعد اس کی فروخت کا پہلا غیر ملکی آرڈر بھی مل گیا ہے اور اس سلسلے میں پاک فضائی کے سیلز اینڈ مارکیٹنگ آفیسر ایئرکموڈور خالد محمود کا کہنا ہے کہ جے ایف 17 طیارے کی فروخت کے پہلے معاہدہ پر دستخط ہوچکے ہیں جس کےتحت 2017 میں یہ طیارے فراہم کئے جائیں گے۔ خالد محمود نے معاہدہ طے کرنے والے ملک کا نام بتانے سے گریز کرتے ہوئے ایشیائی ملک سے معاہدے کی تصدیق کی۔

ائیرکموڈور خالد محمود کا کہنا تھا کہ پاکستان اور چین کے اشتراک سے بننے والے جے ایف 17 تھنڈر طیارے کے آرڈر حاصل کرنے کے لئے پیرس ایئرشو اچھا مقام ہے جہاں فرنچ ممالک کو اس کی جانب راغب کیا جاسکتا ہے جب کہ دیگر 11 ممالک نے پاکستانی لڑاکا طیارے حاصل کرنے میں دلچسپی ظاہر کی ہے۔

واضح رہے کہ پیرس ایئرشو میں پاکستان کے 3 جے ایف 17 تھنڈرطیارے حصہ لے رہے ہیں جن میں ایک طیارہ فضا میں جوہر دکھا رہا ہے جب کہ دوسرا ڈسپلے اور تیسرا ریزرو کے طورپرشامل کیا گیا ہے۔ اس سے قبل جے ایف 17 تھنڈرمتحدہ عرب امارات ، چین اور ترکی کے ائیر شو میں بھی اپنی صلاحیت کے جوہر دکھا چکا ہے۔