ورلڈ ٹوئنٹی 20وینیوز پرآئی سی سی اور بھارت میں ڈیڈ لاک

کونسل میچز پانچ اور بی سی سی آئی 8 اسٹیڈیمز میں منعقد کرنے کا خواہشمند ہے

Sports Desk June 16, 2015

کونسل میچز پانچ اور بی سی سی آئی 8 اسٹیڈیمز میں منعقد کرنے کا خواہشمند ہے۔فوٹو: فائل

ورلڈ ٹوئنٹی 20 کے وینیوز پرآئی سی سی اور بھارت میں ڈیڈ لاک پیدا ہوگیا، کونسل میچز پانچ جبکہ بی سی سی آئی 8 اسٹیڈیمز میں منعقد کرنا چاہتی ہے،چیئرمین گورننگ باڈی این سری نواسن کے شہر چنئی کو بھی میزبانوں کی فہرست سے آئوٹ کیے جانے کا امکان ہے، حتمی فیصلہ آئی سی سی کی سالانہ میٹنگ میں ہوگا۔ تفصیلات کے مطابق ورلڈ ٹوئنٹی 20 کی میزبانی آئندہ برس بھارت کرے گا۔

گذشتہ روز ممبئی میں اسی حوالے سے بی سی سی آئی اور آئی سی سی آفیشلز کے درمیان میٹنگ ہوئی۔ بھارتی بورڈ کی جانب سے سیکریٹری انوراگ ٹھاکر، سندر رامن، رتناکر شیٹھی، سری دھر، آر پی شاہ، امرت ماتھر اور ہیمنگ ایمن شریک ہوئے،آئی سی سی کی ٹیم میں کیمبیل جیمی سان، کرس ٹیٹلی اور دھراج ملہوترا شامل تھے۔ اس موقع پر اجلاس میں ایونٹ کے ممکنہ میزبان وینیوز پر غور کیا گیا۔ آئی سی سی کی جانب سے ایونٹ پانچ شہروں تک محدود رکھنے کی تجویز دی گئی جبکہ بھارتی بورڈ کا اصرار تھا کہ میچز 8 شہروں میں ہونے چاہئیں۔

اجلاس میں چنئی کے ایم اے چدمبرم اسٹیڈیم کا معاملہ بھی زیر غور آیا، آئی سی سی ٹیم اس وینیو کو میزبانی دینے کے حق میں نہیں کیونکہ اس کے تین اسٹینڈز کو سٹی کارپوریشن نے گذشتہ تین برس سے سیل کیا ہوا ہے،کونسل نہیں چاہتی کہ یہ مقابلے خالی اسٹینڈز کے سامنے کھیلے جائیں،تامل ناڈوکرکٹ ایسوسی ایشن کی کوشش ہے کہ اسے بھی میزبانوں میں شامل کرلیا جائے، یہ وہی ایسوسی ایشن ہے جس کے سری نواسن اب بھی صدر اور ساتھ میں آئی سی سی کے چیئرمین کا عہدہ بھی سنبھالے ہوئے ہیں۔

دلچسپ بات یہ ہے کہ بی سی سی آئی نے جن 8 وینیوز کی فہرست آئی سی سی کو دی اس میں بھی چنئی کا ذکر نہیں ہے۔ بھارتی بورڈ کا موقف ہے کہ 11 مارچ سے 3 اپریل تک شیڈول ایونٹ کے دوران مجموعی طور پر 16 ٹیموں کے درمیان35 میچز کھیلے جائیں گے، اگر پانچ اسٹیڈیمز میں انعقاد کیا تو ہر ایک وینیو کے حصے میں7 میچز آئیں گے، اتنے مقابلوں کے دوران وینیوز کا تماشائیوں سے بھرے رہنا مشکل ہے، مگر آئی سی سی کا موقف ہے کہ ایونٹ کو 8گرائونڈز میںکرنے سے اخراجات بڑھ جائیں گے، ذرائع کا کہنا ہے کہ بی سی سی آئی نے پیشکش کی کہ ٹیموں کے سفری اخراجات وہ خود اٹھانے کو تیار ہے، اس پر کوئی حتمی فیصلہ نہیں ہوسکا، اب اس بارے میں رواں ماہ کے آخر میں آئی سی سی میٹنگ میں تبادلہ خیال کیا جائے گا۔