راولپنڈی میں گھر میں آگ لگنے سے میاں بیوی اور 5 بچے جاں بحق

تمام افراد کی اموات دم گھٹنے کے باعث ہوئی، ریسکیو ذرائع۔ فوٹو: فائل

---

اسکیم تھری رضا پلازہ کے قریب گھر میں آگ لگنے سے ایک ہی خاندان کے 7 افراد جاں بحق ہو گئے۔

ایکسپریس نیوز کے مطابق راولپنڈی کے علاقے اسکیم تھری عمار چوک میں رضا پلازہ کے قریب گھر میں آگ لگنے سے میاں بیوی اور 5 بچے جاں بحق ہو گئے۔ ریسکیو ذرائع کے مطابق جاں بحق ہونے والوں میں 3 خواتین اور 4 مرد شامل ہیں۔ جاں بحق ہونے والوں کی شناخت شوکت علی، عائشہ شوکت، عمر شوکت، عمثان، حسن، فاطمہ اور محسن شوکت شامل ہیں۔ جاں بحق ہونے والے افراد کی لاشیں ڈی ایچ کیو اسپتال منتقل کر دی گئی ہیں۔

ریسکیو ذرائع کا کہنا ہے کہ گھروالے سو رہے تھے کہ شارٹ سرکٹ کے باعث آگ لگ گئی اور تمام افراد کی اموات دم گھٹنے کے باعث ہوئی۔ تھانہ ایئرپورٹ کی پولیس نے جائے وقوعہ پر پہنچ کر تحقیقات کا آغاز کردیا ہے۔