مسجد الحرام میں طواف کی گنجائش میں 200 فیصد اضافہ ہوگیا

سعودی حکومت کی جانب سے 2011 میں مسجد الحرام کے توسیعی منصوبے کا سنگ بنیاد رکھا گیا تھا۔ فوٹو : فائل

---

PESHAWAR: سعودی حکومت کی جانب سے شروع کیا گیا مسجد الحرام کا توسیعی منصوبہ مکمل ہونے کے بعد حرم شریف میں خانہ کعبہ کے طواف کی گنجائش میں 2 گنا اضافہ ہوگیا۔

سعودی خبر رساں ادارے العربیہ کی رپورٹ کے مطابق توسیع مطاف کے بعد طواف کی گنجائش میں 200 فیصد اضافہ ہوچکا ہے جس کے بعد کم از کم ایک لاکھ 7 ہزار معتمرین ایک گھنٹے میں طواف کی سعادت سے حاصل کرسکتے ہیں جب کہ اس سے پہلے ایک گھنٹے میں صرف 53 ہزار زائرین طواف کرسکتے تھے۔

مسجد الحرام کے توسیعی منصوبے کے نگران اور وزارت خزانہ کے مندوب انجینئر محمد سمکری کا کہنا ہے کہ مطاف کی توسیع اس انداز میں کی گئی ہے تاکہ زیادہ سے زیادہ زائرین طواف کی سعادت حاصل کرسکیں۔ اس سلسلے میں مطاف کے صحن اور اس کی بالائی منزلوں کو چاروں اطراف میں برابر وسعت دی گئی ہے۔ انہوں نے کہا کہ رکن صفا کے طواف کے مسئلے کے حل کیلئے 25 میٹر کے گردشی چکر کو وسعت دے کر 50 میٹر کیا گیا ہے تاکہ زیادہ سے زیادہ معتمرین اور حجاج کرام طواف کر سکیں۔

مسجد الحرام میں طواف کے لیے بنائی گئی بالائی عمارت کے ایک سے دوسرے ستون کے درمیان کا فاصلہ 26 میٹر رکھا گیا جب کہ ستونوں کی تعداد کم کرنے سے بھی زائرین کے لیے مطاف میں جگہ کھلی ہوگئی ہے۔ اس کے علاوہ معذور اورخصوصی افراد کے لیے مطاف کے گرائونڈ فلور کو بھی کھلا رکھا گیا ہے۔

واضح رہے کہ رمضان المبارک کے مہینے میں عمرے پر جانے والے افراد کی تعداد میں ریکارڈ اضافہ ہوجاتا ہے جب کہ حج کے دوران بھی ہر سال عازمین حج کی بڑھتی تعداد کے باعث 2011 میں سعودی حکومت کی جانب سے مسجد الحرام کے توسیعی منصوبے کا سنگ بنیاد رکھا گیا تھا۔