نئی تجارتی پالیسی تیار برآمدی ہدف50ارب ڈالر مقرر

پالیسی میں ایسے اہداف رکھے گئے ہیں جن پر عملدرآمد ہو سکے کیونکہ سابقہ تجارتی پالیسی پر عملدرآمد نہیں ہو سکاہے

اظہر جتوئی June 25, 2015

ہمسایہ ممالک خصوصاً افغانستان، ایران، چین، ترکمانستان، تاجکستان، ترکی، ازبکستان سے تجارت کو ترجیح دی جائے گی۔ فوٹو: فائل

MULTAN: وفاقی حکومت نے نئی تجارتی پالیسی کو حتمی شکل دے دی،برآمدی ہدف 50 ارب ڈالر مقرر کر دیا گیا، جولائی کے دوسرے ہفتے میں پالیسی کا باقاعدہ اعلان کیا جائے گا۔

وزارت تجارت کے مطابق نئی تجارتی پالیسی کی تیاری کا پراسس مکمل ہوگیا ہے، پالیسی میں ایسے اہداف رکھے گئے ہیں جن پر عملدرآمد ہو سکے کیونکہ سابقہ تجارتی پالیسی پر عملدرآمد نہیں ہو سکاہے، نئی پالیسی میں ویلیو ایڈیشن پر زور دیا گیا ہے تاکہ برآمدات میں اضافہ کیا جا سکے، نئی تجارتی پالیسی میں عالمی اسٹینڈرڈکو بھی فوکس کیا گیا ہے۔

ہمسایہ ممالک خصوصاً افغانستان، ایران، چین، ترکمانستان، تاجکستان، ترکی، ازبکستان سے تجارت کو ترجیح دی جائے گی، نئی پالیسی کے تحت پاکستانی خام مال کو ویلیو ایڈیشن کی طرف شفٹ کیا جائے گا تاکہ زیادہ سے زیادہ زرمبادلہ کمایا جا سکے، عالمی چیلنجز کے مقابلے کے لیے اشیا کا معیار بہتر بنایا جائے گا اور ان کی ٹیسٹنگ کے مسائل کو بھی اب پاکستان کے اندر حل کیا جائے گا، عالمی سطح پر اشیا کی برآمد کے حوالے سے آنے والے ٹیکنیکل مسائل کو حل کرنے کے لیے بھی اقدامات کیے جائیں گے۔