معین خان پی سی بی میں ایک اور اننگز کھیلنے کے لیے تیار

چیف سلیکٹرکی ذمے داری سے الگ کرنے پر کسی کو مورد الزام نہیں ٹھہراتا،سابق قائد فوٹو فائل

---

سابق چیف سلیکٹر معین خان پی سی بی میں ایک اور اننگز کھیلنے کیلیے تیار ہیں، انھوں نے کہاکہ کرکٹ ہی میرا اوڑھنا بچھونا ہے، میں ہمیشہ اس کھیل سے وابستہ رہوں گا۔

میرے ساتھ کوئی ناانصافی نہیں ہوئی، اسپورٹسمین ہونے کے ناطے ہمیشہ غلطیوں سے سیکھنے کی کوشش کرتا ہوں، جمعرات کو اپنے نام سے منسوب کرکٹ اکیڈمی میں میڈیا سے گفتگو کرتے ہوئے معین خان نے کہا کہ میں نے ہمیشہ اپنے ملک و قومی کی خدمت کو شعار بنایا ، آئندہ بھی کھیل کے ذریعے اپنا کردار ادا کرتا رہوں گا۔

انھوں نے کہا کہ چیف سلیکٹر کی ذمے داری سے الگ کرنے پر کسی کو مورد الزام نہیں ٹھہراتا، یہ درست نہیںکہ اس معاملے میں میرے ساتھ کوئی ناانصافی ہوئی، عالمی کپ کے لیے روانگی سے قبل ہی میں نے کہہ دیا تھا کہ ذمے داری سے سبکدوشی کے بعد بھی کرکٹ ہی سے منسلک رہوں گا، میں نے ہمیشہ سیکھنے کی کوشش کی، ہوسکتا ہے کہ مجھ میں کوئی کمی رہی ہو۔

کرکٹ کھیلنے کے دوران بھی نشیب و فراز کا سامنا کیا، مگر میرے لیے پاکستان کی عزت اور ناموس سے بڑھ کر کوئی چیز نہیں، قومی کرکٹ کو جب بھی ضرورت پڑی خدمات حاضر ہوں گی۔