’35 پنکچر‘ کے الزام پر معافی تحریک انصاف کے رہنما آمنے سامنے

نجم سیٹھی سے معافی مانگنے کا سوال ہی پیدا نہیں ہوتا، نعیم الحق۔ فوٹو: فائل

---

KARACHI: پاکستان تحریک انصاف کے رہنما عارف علوی نے سابق نگراں وزیراعلیٰ پنجاب نجم سیٹھی پر عام انتخابات کے بعد '35 پنکچر' کا الزام لگانے پر معافی مانگ لی ہے جبکہ نعیم الحق نے معافی مانگے سے انکار کردیا ہے۔


ایکسپریس نیوز کے مطابق عارف علوی کا کہنا تھا کہ ہمیں غلط اطلاعات اور افواہوں کی تصدیق کرنی چاہیئے تھی، تحریک انصاف نے افواہوں اور غلط اطلاعات پر نجم سیٹھی پر 35 پنکچر کا الزام لگایا جس پر معذرت کرتے ہیں۔ دوسری جانب نجم سیٹھی نے بھی سوشل میڈیا پر عارف علوی کی جانب سے معذرت پر شکریہ ادا کیا، تحریک انصاف کی جانب سے اپنی غلطی پر معذرت کرنا اچھا اقدام ہے۔

@ArifAlvi @SavailHussain Dr Saheb! I was more hurt by your comments than IK's because I believed you to be fair ideological politico. Thanks

— Najam Sethi (@najamsethi) July 2, 2015

عارف علوی کے بیانات پر اپنا موقف دیتے ہوئے ترجمان عمران خان نعیم الحق کا کہنا ہے کہ نجم سیٹھی سے معافی کا سوال ہی پیدا نہیں ہوتا، عارف علوی کو تمام حقائق کا علم نہیں تھا۔ ذرائع تحریک انصاف کا کہنا ہے کہ تحریک انصاف نے عارف علوی معذرتی بیان پر وضاحت طلب کر لی ہے، پارٹی کی جانب سے 35 پنکچر کا بیان بلاوجہ نہیں دیا گیا، عارف علوی کو سوشل میڈیا پر بیان دینے سے پرہیز کرنا چاہیئے تھا۔

واضح رہے کہ گزشتہ روز پاکستان تحریک انصاف کے چیرمین عمران خان نے بھی 35 پنکچر کو سیاسی بیان قرار دیا تھا۔