خیبرپختونخوا کرپشن کے الزام میں معدنیات کے موجودہ و سابق وزرا کمشنر بنوں سمیت 7 افراد گرفتار

مالی بے ضابطگیوں کے الزام میں کمشنر بنوں اور کمشنر معدنیات سمیت 10 افراد کو بھی گرفتار کیا گیا ہے، نیب۔ فوٹو: فائل

---

معدنیات كی كانوں كے ٹھیكوں اور فنڈز میں خورد برد كے الزام میں صوبائی احتساب كمیشن نے تحریك انصاف كے رہنما اور صوبائی وزیر معدنیات ضیاءاﷲ آفریدی کو گرفتار کرلیا۔



صوبائی احتساب كمیشن كے مطابق صوبائی وزیر معدنیات ضیااللہ آفریدی كو اختیارات سے ناجائز فائدہ اٹھاتے ہوئے محكمہ معدنیات كے مختلف ٹھیكوں اور دیگرفنڈزمیں كروڑوں روپے خوردبرد كرنے كے الزام میں گرفتاركیا گیا ہے، ملزم كے خلاف چند ماہ قبل انكوائری شروع ہوئی اورانكوائری مكمل كرنے كے بعد یہ بات سامنے آئی كہ ملزم نے معدنیات كے مختلف ٹھیكوں اور دیگرفنڈزمیں كروڑوں روپے كاغبن كیا ہے جس پرملزم كوگزشتہ روز گرفتار كیاگیا جب كہ ملزم كو آج احتساب كمیشن عدالت میں جسمانی ریمانڈ کے لیے پیش کیا جائے گا۔





قومی احتساب بیورو (نیب) خیبرپختونخوا كے مطابق سابق صوبائی وزیر معدنیات اور پیپلز پارٹی كے دیرینہ رہنما محمودزیب نے وزارت كے دوران اختیارات سے ناجائز فائدہ اٹھاتے ہوئے سابق سیكرٹری معدنیات حال كمشنربنوں عصمت اللہ گنڈاپور، سیكشن آفیسر فرہاد علی، ڈائریكٹر معدنیات خان بادشاہ، سینئرجیالوجسٹ نوروزخان، كمشنرمعدنیات زیارت خان، ڈائریكٹر لائسنز معدنیات اسسٹنٹ ڈائریكٹراحتشام الحق سے ملی بھگت كركے ایك خاتون رخسانہ جاوید جوایک سكول ٹیچر ہے وہ كوہری پور میں سركاری500 ایكڑاراضی الاٹ كی تھی اوراس اراضی سے36 كروڑروپے مالیت كے مختلف معدنیات فروخت كركے قومی خزانے كو نقصان پہنچایاگیا ہے۔



نیب کے مطابق ملزموں كے خلاف پہلے انكوائری مقرر كی گئی تھی اوربعد میں انكوائری میں یہ ثابت ہوا كہ ملزمان نے اختیارات سے ناجائز فائدہ اٹھاتے ہوئے قومی خزانے كوكروڑوں روپے نقصان پہنچایا جس پر ملزمان كو گرفتار كر لیا گیا ہے جب كہ ملزمان كو آج احتساب عدالت میں جسمانی ریمانڈ کے لیے پیش کیا جائے گا۔





دوسری جانب تحریک انصا ف کے صوبائی وزیر کی گرفتاری پر عمران خان کا کہنا ہے کہ ضیااللہ آفریدی پر کرپشن کا الزام لگنے کا افسوس ہے وہ پارٹی کے اہم رکن ہیں تاہم اگر ان پر کرپشن ثابت ہوئی تو انہیں استعفیٰ دینا ہوگا۔