پاکستان نے پہلے ون ڈے میں سری لنکا کو 6 وکٹوں سے شکست دے دی

محمد حفیظ 103 اورشعیب ملک 55 رنز کے ساتھ نمایاں بیٹسمین رہے۔

ویب ڈیسک July 11, 2015

محمد حفیظ نے شاندار بیٹنگ کرتے ہوئے 4 چھکوں اور 10 چوکوں کی مدد سے 103 رنز بنائے۔ فوٹو: اے ایف پی

پاکستان نے پانچ ایک روزہ میچز پر مشتمل سیریز کے پہلے میچ میں سری لنکا کو محمد حفیظ کی شاندار سنچری کی بدولت 6 وکٹوں سے شکست دے دی۔

سری لنکا کے رنگیری دمبولا انٹرنیشنل اسٹیڈیم میں کھیلے گئے میچ میں سری لنکا نے قومی ٹیم کو جیت کے لئے 256 رنز کا ہدف دیا جسے گرین شرٹس نے محمد حفیظ کی شاندار سنچری کی بدولت باآسانی 6 وکٹوں پر حاصل کرلیا۔ محمد حفیظ نے اپنے کیرئیر کی دسویں سنچری اسکور کی وہ 103 رنز بنا کر آؤٹ ہوئے۔ احمد شہزاد 29، اظہرعلی 21 اوربابراعظم 25 رنزبنا کرآؤٹ ہوئے جب کہ شعیب ملک اورمحمد رضوان بالترتیب 55 اور20 رنزکے ساتھ ناٹ آؤٹ رہے۔ سری لنکا کی جانب سے انجیلو میتھیوز، سرنگا لکمل، تلکرانے دلشان اورتھسارا پریرا نے ایک ایک وکٹ حاصل کی۔

اس سے قبل پاکستان کے کپتان اظہرعلی نے ٹاس جیت کرمیزبان ٹیم کو بیٹنگ کی دعوت دی جب کہ سری لنکا نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر255 رنز بنائے۔ دنیش چندیمل 65 رنز کے ساتھ ٹاپ اسکورر اور ناٹ آؤٹ رہے۔ تلکراتنے دلشان 38، کوشال پریرا 26، لھیرو تھرمانے 23، اپل تھارنگا 20، کپتان انجیلو میتھیوز 38، ملندا سریوندانا 22، تھسارا پریرا ایک اور پرسانا بغیر کوئی رنزبنائے آؤٹ ہوئے۔ پاکستان کی جانب سے محمد حفیظ نے شاندار بولنگ کرتے ہوئے 4 شکار کئے جب کہ راحت علی نے 2، محمد انور اوریاسرشاہ نے ایک ایک وکٹ حاصل کی۔ میچ میں بہترین کارکردگی پیش کرنے پرمحمد حفیظ کو مین آف دی میچ کے اعزاز سے نوازا گیا۔