سندھ اپیکس کمیٹی اجلاس کراچی آپریشن تیز کرنے اور کالعدم تنظیموں کے خلاف کریک ڈاؤن کا فیصلہ

قومی ایکشن پلان پرعملدرآمدمیں سستی سےجرائم پیشہ افراد کیخلاف کارروائی متاثرہورہی ہے، اجلاس میں اتفاق فوٹو: فائل

---

لاہور: وزیراعلیٰ سندھ سید قائم علی شاہ کی زیرصدارت صوبائی اپیکس کمیٹی نے کراچی کو ہر قیمت جرائم اوردہشت گردی سے پاک شہر بنانے پر اتفاق کیا ہے جب کہ وزیراطلاعات سندھ شرجیل میمن کا کہنا ہے کہ سندھ میں امن وامان کی صورتحال تمام صوبوں سے بہتر ہے۔

وزیراعلیٰ ہاؤس کراچی میں وزیراعلیٰ قائم علی شاہ کی زیر صدارت صوبائی اپیکس کمیٹی کے اجلاس میں گورنر سندھ ڈاکٹرعشرت العباد خان، چیف سیکریٹری سندھ صدیق میمن، سیکریٹری داخلہ مختار سومرو، کور کمانڈر کراچی لیفٹیننٹ جنرل نوید مختار، ڈی جی رینجرز میجر جنرل بلال اکبر، آئی جی سندھ غلام حیدر جمالی، قانون نافذ کرنے والے اداروں اور انٹیلی جنس اداروں کے افسران سمیت دیگر حکام نے شرکت کی۔



ذرائع کا کہنا ہے کہ اجلاس میں سندھ رینجرز کے اختیارات کی مدت، آپریشنل پالیسی، صوبائی حکومت اور قانون نافذ کرنے والے اداروں کے درمیان رابطوں کو مزید موثر بنانے سمیت دیگر اہم امور پر غور کیا گیا اوراجلاس میں دہشت گردوں، ان کے معاونین اور مالی معاونت کرنے والوں کے خلاف جاری کارروائیوں کو مزید موثر بنانے کی حکمت عملی بھی طے کی گئی۔ اجلاس میں اتفاق کیا گیا کہ قومی ایکشن پلان پرعملدرآمد میں سستی سے جرائم پیشہ افراد کے خلاف کارروائی متاثر ہورہی ہے، کراچی کوہر قیمت پر جرائم اور دہشت گردی سے پاک شہر بنایا جائے گا اور اس کے لئے دہشت گردوں کے خلاف آپریشن کو منطقی انجام تک پہنچایا جائے گا۔





دوسری جانب میڈیا سے بات کرتے ہوئے وزیراطلاعات سندھ شرجیل انعام میمن نے کہا کہ اپیکس کمیٹی نے اس بات پر اتفاق کیا کہ کراچی آپریشن سے دہشت گردی کے واقعات میں کمی واقع ہوئی اور یہ آپریشن دہشت گردی کے مکمل خاتمے تک جاری رہے گا جب کہ کمیٹی نے سندھ رینجرز اور پولیس کی کارکردگی کو سراہتے ہوئے دہشت گردوں کے معاونین اور سہولت کاروں کے خاتمے کا فیصلہ کیا۔ انہوں نے کہا کہ دہشت گردی کی تمام جڑیں ختم کی جائیں گی جس کے لیے کالعدم تنظیموں اور دہشت گردوں کو تربیت دینے والے تمام مدارس کے خلاف کارروائی تیز کرنے کا فیصلہ کیا گیا جب کہ دہشت گردی میں ملوث ہر طرح کے عناصر کو منطقی انجام تک پہنچایا جائے گا۔





اپیکس کمیٹی کے اجلاس سے قبل پاکستان پیپلز پارٹی کے چیئرمین بلاول بھٹو زرداری نے کور کمانڈر کراچی لیفٹیننٹ جنرل نوید مختار سے ملاقات کی جس میں ڈی جی رینجرز سندھ میجر جنرل بلال اکبر، گورنر سندھ ڈاکٹر عشرت العباد خان اور وزیر اعلیٰ قائم علی شاہ بھی شریک تھے۔ ذرائع کے مطابق ملاقات کے دوران کراچی میں امن وامان کی موجودہ صورتحال اور رینجرز کے ٹارگٹڈ آپریشن پر تفصیلی تبادلہ خیال کیا گیا۔ اس موقع پر بلاول بھٹو زرداری نے یقین دہانی کرائی کہ کراچی میں امن وامان برقرار رکھنے، کرپشن و لینڈ مافیا کے خلاف کارروائی اور دہشت گردی کے خاتمے کے لئے ہر ممکن تعاون فراہم کیا جائے گا۔