سلمان خان آج کل شاہ رخ اوران کی فلموں کے قصیدے پڑھنے لگے

شاہ رخ کی فلم ’’فین‘‘ کا ٹیزر نہیں دیکھا لیکن یقین سے کہہ سکتا ہوں کہ وہ شاندار ہوگا،سلمان خان فوٹو:فائل

---

بالی ووڈ کے سپر اسٹار سلمان خان نے ساتھی اداکار شاہ رخ خان کی نئی آنے والی فلم ''فین'' کا ٹیزر دیکھے بغیر ہی اسے شاندار قرار دے دیا۔

بھارتی فلم انڈسٹری کے ماضی کے حریف کنگ اور دبنگ خان کی دوستی وقت کے ساتھ ساتھ گہری ہوتی جارہی ہے جب کے اب دونوں اداکار سماجی رابطے کی ویب سائٹ ٹوئٹر سمیت مختلف تقریبات میں ایک دوسرے سے دوستی کا دم بھرتے نظر آتے ہیں تاہم اب دونوں کیمرے کے سامنے بھی ایک دوسرے کی فلموں کی تعریفیں کرنے لگے ہیں۔

میڈیا رپورٹس کے مطابق سلو میاں نے بھارتی اداکار انوپم کھیر کے مشہور ٹی وی شو میں شرکت کی اور کنگ خان کی تعریفوں کے پل باندھ دیئےجب کہ شاہ رخ خان کی نئی فلم''فین'' کے ٹیزر سے متعلق سوال پر سلمان خان کا کہنا تھا کہ انہوں نے اب تک فلم کا ٹیزر نہیں دیکھا تاہم دیکھے بغیر کہہ سکتا ہوں کہ فلم کا ٹیزر بہت شاندار ہے۔

واضح رہے کہ شاہ رخ خان کی نئی فلم ''فین'' کا ٹریلر آتے ہی انٹرنیٹ پر چھا گیا ہے جسے 2 دنوں میں اب تک23 لاکھ سے زائد افراد دیکھ چکے ہیں۔