الطاف حسین بھارتی زبان بولتے ہیں برطانیہ سے بات ہوگی چوہدری نثار

اردو بولنے والی کمیونٹی مہذہب اور تہذیب یافتہ ہے لیکن الطاف حسین اس تضحیک کررہے ہیں، وفاقی وزیر داخلہ ،فوٹو:فائل

---

وفاقی وزیر داخلہ چوہدری نثار کا کہنا ہےکہ الطاف حسین نے گزشتہ روز اپنی تقریر میں تہذیب اور شرافت کی تمام حدیں پار کردیں ان کی جانب سے فوج اور رینجرز کے خلاف گالی گلوچ سمجھ سے باہر ہے لہٰذا الطاف حسین کی تقاریر کے معاملے پر بہت صبر کیا لیکن اب اس پر برطانیہ سے بات کرنے کا وقت آگیا ہے۔



ایم کیوایم کے قائد الطاف حسین کی جانب سے گزشتہ روز کی گئی تقریر پر اپنے رد کا اظہار کرتے ہوئے ایک بیان میں وزیرداخلہ چوہدری نثار نے کہا کہ الطاف حسین کی جانب سے سکیورٹی اداروں کے خلاف بدترین زبان استعمال کی گئی، الطاف حسین نے ہمارے دشمن بھارت کی زبان استعمال کی اور انہوں نے اپنی تقریر میں تہذیب اور شرافت کی تمام حدیں پار کردیں ان کی تقاریر اشتعال انگیزی کی آخری حدوں کو چھو رہی ہیں، الطاف حسین کے معاملے پر ہر طرح سے صبر و تحمل کا مظاہرہ کیا لیکن اب ان کی تقاریر پر برطانیہ سے بات کرنے کا وقت آگیا ہے۔





چوہدری نثار نے کہا کہ سکیورٹی اداروں کے خلاف بدزبانی ناقابل برداشت ہے، بیرون ملک سے دفاعی اداروں پر گالیوں کی اجازت نہیں دے سکتے، الطاف حسین کی صورتحال کی ذمہ دار فوج یا رینجرز نہیں، لگتا ہے برطانیہ میں ان کے کرتوتوں کی وجہ سے ان کے گرد گھیرا تنگ ہورہا ہے اور اس کا غصہ اور مایوسی اپنے اداروں پر نکالا جارہا ہے۔ وزیر داخلہ کا کہنا تھا کہ اردو بولنے والی کمیونٹی مہذہب اور تہذیب یافتہ ہے لیکن الطاف حسین اس تضحیک کررہے ہیں۔







دوسری جانب ایکسپریس نیوز کے پروگرام ''کل تک''میں خصوصی گفتگو کرتے ہوئے خواجہ آصف کا کہنا تھا کہ ہماری افواج پاکستان دشمنوں کے ساتھ بر سرپیکار ہیں ایسے میں برطانوی شہری الطاف حسین کو فوج کے خلاف گندی زبان نہیں بولنا چاہیے جب کہ کسی شخص کو کوئی حق نہیں کہ وہ فوج کے خلاف ایسی بات کرے۔



خواجہ آصف کا کہنا تھاکہ الطاف حسین نے کراچی میں قیامت برپا کی ہوئی ہے، بھتہ مافیا، قبرستان اور اسکول بیچنا دہشت گردی ہے جب کہ ہم پچھلے ایک سال سے برطانوی حکومت سے رابطے میں ہیں اب الطاف حسین کو اپنا انجام نظر آرہا ہے۔



وزیر دفاع نے کہا کہ الطاف حسین کا بیان پاکستانیوں کی توہین ہے ان کی تقریر کا فوج اور آپریشن ضرب عضب پر کوئی اثرنہیں پڑے گا اور پاک فوج کی قربانیاں رائیگاں نہیں جائیں گی۔ انہوں نے کہا کہ الطاف حسین بر طانوی شہری کی حیثیت سے جو مرضی کہیں لیکن پاک فوج کے شہدا کی قربانیوں کو کسی صورت نہیں بھلایا جاسکتا۔

واضح رہے کہ گزشتہ روز الطاف حسین نے نائن زیرو پر ٹیلی فونک خطاب میں کہا تھا کہ ڈی جی رینجرز سندھ وائسرائے کا کردار ادا کررہے ہیں اور وہ وزیراعظم نوازشریف کے ذاتی ملازم بن کر اپنے بنیادی فرائض کی ادائیگی میں مجرمانہ غفلت کا مظاہرہ کررہے ہیں۔