دہشت گردوں کے سہولت کاروں اور مالی معاونت کرنے والوں کے خلاف بلا امتیاز کریک ڈاؤن کا فیصلہ

دہشت گردوں کی مالی معاونت کرنے والوں کے خلاف بلاامتیاز کارروائی جاری رہے گی،کور کمانڈر لاہور۔ فوٹو:فائل

---

ایپکس کمیٹی پنجاب نے کالعدم تنظمیوں کی سرگرمیوں کو پوری قوت سے روکنے پر اتفاق کیا ہے۔



وزیراعلیٰ پنجاب محمد شہباز شریف كی زیرصدارت صوبائی ایپكس كمیٹی كا چھٹا اجلاس منعقد ہوا جس میں كور كمانڈر لاہور لیفٹیننٹ جنرل نوید زمان، صوبائی وزیر كرنل (ر) شجاع خانزادہ، چیف سیكرٹری، ڈی جی رینجرز پنجاب میجر جنرل عمر فاروق بركی، جنرل آفیسر كمانڈنگ 10 ڈویژن میجر جنرل سردار طارق امان، انسپكٹر جنرل پولیس پنجاب، صوبائی سیكرٹری داخلہ اور متعلقہ اعلیٰ سول و ملٹری حكام نے اجلاس میں شركت كی۔



صوبائی ایپكس كمیٹی كے اجلاس میں نیشنل ایكشن پلان كے تحت پنجاب میں انسداد دہشت گردی كیلئے اقدامات پر اطمینان كا اظہار كیا گیا اور دہشت گردوں اور ان كے سہولت كاروں كے خلاف حالیہ كامیاب كارروائیوں پر پنجاب حكومت اور قانون نافذ كرنے والے اداروں كی كاركردگی كو سراہا گیا جب کہ اجلاس كے دوران نیشنل ایكشن پلان پر مزید موثر انداز میں تیز رفتاری سے اقدامات پر اتفاق كیا گیا۔



ایپكس كمیٹی نے دہشت گردی، انتہاپسندی و فرقہ واریت كے مكمل خاتمے كے بھرپور عزم كا اعادہ كیا جب کہ اجلاس میں فیصلہ كیا گیا كہ پنجاب میں كالعدم تنظیموں كے زكوٰۃ اور فطرانہ اكٹھا كرنے پر پابندی ہوگی اوركسی بھی كالعدم تنظیم كو زكوٰۃ و فطرانہ اكٹھا كرنے كی اجازت نہیں دی جائے گی، اسی طرح كالعدم تنظیموں كی سرگرمیوں كا پوری قوت سے قلع قمع كیا جائے گا، اجلاس میں یہ بھی فیصلہ كیا گیا كہ دہشت گردوں و انتہاپسندوں كے سہولت كاروں اور مالی معاونت كرنے والوں كے خلاف بلاامتیاز كریک ڈاؤن كیا جائے گا۔





وزیراعلیٰ محمد شہباز شریف نے صوبائی ایپكس كمیٹی كے اجلاس سے خطاب كرتے ہوئے كہا كہ نیشنل ایكشن پلان ملک سے دہشت گردی كے خاتمے كیلئے قومی عزم كا عكاس ہے، وفاقی حكومت اور صوبائی حكومتیں مكمل یكجہتی كے ساتھ نیشنل ایكشن پلان كے تحت كارروائی كر رہی ہیں اور پوری قوم ملک سے دہشت گردی كو جڑ سے اكھاڑ پھینكنے كا عزم كر چكی ہے۔ انہوں نے كہا كہ پاک افواج كا دہشت گردوں كے خلاف كامیاب آپریشن ضرب عضب پوری قوت سے جاری ہے اور اس آپریشن كے ذریعے دہشت گردوں پركاری ضرب لگائی گئی ہے، آپریشن ضرب عضب كے ذریعے وطن اور امن كے دشمنوں كو كیفر كردار تک پہنچایا جا رہا ہے، پاک افواج نے دہشت گردوں كے خلاف جنگ میں جرأت اور بہادری كی نئی تاریخ رقم كی ہے، پاک افواج، پولیس، سكیورٹی اداروں كے افسران و اہلكاران كے علاوہ قوم كے بچوں سمیت معاشرے كے ہر طبقے نے دہشت گردی كے خلاف جنگ میں لازوال قربانیاں دی ہیں، دہشت گردی كے خلاف جنگ ملک كی بقا كی جنگ ہے اور پوری قوم پاک افواج كے ساتھ شانہ بشانہ كھڑی ہے۔





وزیراعلیٰ پنجاب کا کہنا تھا کہ ملک سے آخری دہشت گرد كے خاتمے تک جنگ جاری رہے گی، ملک كو دہشت گردوں كے ناپاک وجود سے پاک كركے دم لیں گے اور دہشت گردی كے خلاف جنگ كو منطقی انجام تک پہنچائیں گے، دہشت گردوں اور ان كے سہولت كاروں كو پاكستان میں سر چھپانے كی جگہ نہیں ملے گی اور انہیں كیفر كردار تک پہنچا كر دم لیں گے۔ انہوں نے كہا كہ پنجاب حكومت نے نیشنل ایكشن پلان كے تحت انسداد دہشت گردی كے حوالے سے موثر اقدامات كئے ہیں، صوبے میں انسداد ددہشت گردی فورس تشكیل دی گئی ہے اور اسے جدید تربیت سے آراستہ كیا گیا ہے، وال چاكنگ، لاؤڈ اسپیكر كے استعمال، اشتعال انگیز تقاریر اور مذہبی منافرت پر مبنی لٹریچر كی اشاعت و تقسیم كی پابندی پر پوری طرح عملدرآمد كیا جا رہا ہے اور اس حوالے سے قانون سازی كركے سزائیں سخت كی گئی ہیں۔





اس موقع پر كور كمانڈر لاہور لیفٹیننٹ جنرل نوید زمان نے كہا كہ دہشت گردوں كے نیٹ ورک ان كے سہولت كاروں اور مالی معاونت كرنے والوں كے خلاف بلاامتیاز كارروائی جاری رہے گی جب کہ اجلاس كے دوران نیشنل ایكشن پلان كے تحت پنجاب میں انسداد دہشت گردی كیلئے اٹھائے جانے والے اقدامات كے حوالے سے تفصیلی بریفنگ بھی دی گئی۔