جاپان کے نوجوان شادی کرنے سے گریزاں

اگر شرح پیدائش میں گراوٹ کا سلسلہ جاری رہا تو آنے والی صدی میں جاپان دنیا کے نقشے پرنہیں ہوگا،ماہرین

ع۔ر July 21, 2015

گِرتی ہوئی آبادی حکومت کے لیے دردِ سر بن گئی ۔ فوٹو : فائل

پاکستان سمیت دنیا کے کئی ممالک بڑھتی ہوئی آبادی کی وجہ سے پریشان ہیں۔ آبادی میں اضافے سے قدرتی وسائل پر دباؤ بڑھتا چلا جاتا ہے جس سے ملکی ترقی کے ساتھ ساتھ عوام کا معیار زندگی بھی متاثر ہوتا ہے۔خیر، پاکستان کے معاملے میں بڑھتی ہوئی آبادی سے زیادہ حکمرانوں کی لوٹ مار ملک و قوم کو نقصان پہنچا رہی ہے۔

دنیا میں کئی ممالک ایسے ہیں جن کی گھٹتی ہوئی آبادی ان کے لیے دردِ سر بن گئی ہے۔ جاپان کا شمار بھی ان ہی ملکوں میں ہوتا ہے۔ جاپان کی وزارت خارجہ کے مطابق پچھلے چھے سال سے آبادی میں مسلسل کمی ہورہی ہے۔ 2013ء کے مقابلے میں 2014ء میں ملک کی آبادی 271058 نفوس کم ہوئی۔ ماہرین کا کہنا ہے کہ اگر شرح پیدائش میں گراوٹ کا سلسلہ جاری رہا تو آنے والی صدی میں جاپان دنیا کے نقشے پرنہیں ہوگا۔

مشرقی ایشیائی ملک کی تیزی سے گھٹتی آبادی کی کئی وجوہ ہیں۔ ان میں بچے کی پیدائش اور پرورش پر آنے والے بلند اخراجات، تجارتی و کاروباری شعبوں میں عورتوں کی بڑھتی ہوئی تعداد، شادی میں نوجوان عورتوں اور مردوں کی عدم دل چسپی شامل ہیں۔شرح پیدائش میں اضافے کے لیے کئی برس سے حکومت سرتوڑ کوششیں کررہی ہے۔ شادی کرنے کے لیے نوجوانوں کی حوصلہ افزائی کے ساتھ ساتھ نومولود بچوں کی پرورش میں ان کا ہاتھ بٹانے کی پیش کش بھی کی گئی ہیں۔ تاہم ان اقدامات کا اب تک کوئی مثبت نتیجہ برآمد نہیں ہوا۔

دنیا کی تیسری بڑی معیشت کی آبادی اس وقت 12 کروڑ60 لاکھ ہے۔ اگر شرح پیدائش و اموات کے درمیان موجودہ فرق برقرار رہتا ہے تو 2050ء تک جاپانیوں کی تعداد مزید تین کروڑ کم ہوجائے گی۔

ماہرین خبردار کررہے ہیں کہ گرتی ہوئی آبادی ملک کو مختلف طرح سے متاثر کرے گی۔ اس کا سب سے زیادہ اثر ترقی کی رفتار پر پڑے گا۔ کیوں کہ ملک میں عمررسیدہ لوگوں کی تعداد بڑھتی جارہی ہے۔ جاپان کی تاریخ میں پہلی بار 60 سال سے زائد عمر کے افراد کی تعداد مجموعی آبادی کا 25 فی صد تک پہنچ گئی ہے۔