سلمان خان کا پاکستانی رپورٹر چاند نواب سے ملاقات کی خواہش کا اظہار

بالی ووڈ کے سپراسٹار سلمان خان نے اپنی فلم''بجرنگی بھائی جان'' کی کامیابی کے بعد پاکستانی صحافی چاندنواب سے ملاقات کی خواہش کا اظہار کردیا۔

بالی ووڈ اسٹار سلمان خان کی نئی فلم ''بجرنگی بھائی جان'' اپنی ریلیز کے ساتھ ہی باکس آفس پر کامیابی کے کئی ریکارڈز اپنے نام کر رہی ہے جب کہ فلم میں دبنگ خان نے بجرنگی بھائی جان اور اداکار نوازالدین نے پاکستانی صحافی چاند نواب کا کردار اداکیا ہے تاہم فلم میں چاند نواب کےکردار کو شائقین نے بے حد پسند کیا جس کی بدولت چاند نواب راتوں رات شہرت کی بلندیوں پر پہنچ چکے ہیں۔


میڈیا رپورٹس کے مطابق سلمان خان اپنی فلم کی کامیابی پر بے حد خوش ہیں اور انہوں نے فلم میں رپورٹر کے کردار سے متاثر ہوکر پاکستانی صحافی چاند نواب سے ملاقات کی خواہش کا اظہار کیا ہے جسے پورا کرنے کے لیے انتظامات کیے جارہے ہیں تاہم اب دیکھنا ہے کہ بالی ووڈ اسٹار چاند نواب سے ملاقات کا بلاوا کب بھیجتے ہیں۔