ایم کیوایم کے 3 کارکن 90 روز کے لیے رینجرز کے حوالے

انسداد دہشت گردی کی عدالت نے ایم کیو ایم کے 3 کارکنوں کو 90 روز کے لیے رینجرز کی تحویل میں دے دیا۔


ایکسپریس نیوز کے مطابق رینجرز نے ایم کیو ایم کے 3 کارکنوں محمد عتیق، محمد جمیل اور مسعود راجپوت کو انسداد دہشت گردی کی عدالت میں پیش کیا۔ رینجرز کے وکلا کی جانب سے موقف اختیار کیا گیا کہ تینوں ملزمان بھتہ خوری، جبری فطرہ اور زکٰوۃ وصولی اور ٹارگٹ کلنگ میں ملوث ہیں، ملزمان سے مزید تفتیش کے لئے انہیں 90 روزہ ریمانڈ پر رینجرز کے حوالے کیا جائے۔عدالت نے رینجرز کی استدعا پرتینوں ملزمان کو 90 روز کے لئے رینجرز کی تحویل میں دے دیا۔

واضح رہے کہ رینجرز نے ایم کیو ایم کے تینوں کارکنوں محمد عتیق، محمد جمیل اور مسعود راجپوت کو گارڈن تھانے کی حدود سے گرفتار کیا تھا۔